சென்னை: ஒவ்வொரு ஐபிஎல் தொடரின் முடிவிலும் எழும் “தோனி ஓய்வு பெறுவாரா?” என்ற கேள்விக்கு, இம்முறை உறுதியான பதில் கிடைத்துள்ளதாகத் தகவல்கள் தெரிவிக்கின்றன. சென்னை சூப்பர் கிங்ஸ் அணியின் தலைவர் எம்.எஸ். தோனி, 2026ஆம் ஆண்டு ஐபிஎல் தொடரே தனது கடைசி சீசனாக இருக்கும் என அணி நிர்வாகத்திடம் தெரிவித்துள்ளதாக நம்பத்தகுந்த வட்டாரங்கள் கூறுகின்றன.
இறுதி முடிவில் தோனி?
கடந்த சில ஆண்டுகளாக, ஓய்வு குறித்த கேள்விகளைப் புதிரான புன்னகையுடன் கடந்துவந்த 44 வயதான தோனி, இம்முறை தனது முடிவில் தெளிவாக இருப்பதாகக் கூறப்படுகிறது. தனது இறுதி சீசனை மறக்க முடியாததாக மாற்ற, அவர் இப்போதிருந்தே கடுமையான உடற்பயிற்சி மற்றும் கிரிக்கெட் பயிற்சிகளைத் தொடங்கியுள்ளதாகவும் தெரிகிறது.
வீரராக இல்லாவிட்டாலும், சிஎஸ்கே-வுடனேயே இருப்பேன்
ஒரு வீரராக ஓய்வு பெற்றாலும், சிஎஸ்கே உடனான தனது பந்தம் தொடரும் என்பதை தோனியே சமீபத்தில் உறுதி செய்திருந்தார். ஒரு நிகழ்வில் பேசிய அவர், “நானும் சிஎஸ்கே-வும் இணைந்தே இருப்போம். இன்னும் 15-20 ஆண்டுகளுக்கு இந்தக் கூட்டணி தொடரும். ஆனால், நான் அத்தனை ஆண்டுகள் விளையாடுவேன் என்று நினைக்க வேண்டாம்,” என சிரித்தபடி குறிப்பிட்டார். இதன்மூலம், அவர் பயிற்சியாளராகவோ அல்லது ஆலோசகராகவோ அணியுடன் தொடர்வார் என்பது கிட்டத்தட்ட உறுதியாகியுள்ளது.
2008 முதல் சென்னை அணியின் முகமாகவும், ஆன்மாவாகவும் திகழ்ந்து, ஐந்து முறை கோப்பையை வென்று தந்த தோனியின் கிரிக்கெட் பயணத்தின் இறுதி அத்தியாயமாக 2026 சீசன் அமையும் என்பதால், ஒவ்வொரு போட்டியும் ரசிகர்களுக்கு உணர்ச்சிப்பூர்வமான தருணமாகவே இருக்கும்.
