மெல்பேர்ன், ஜனவரி 17: தென்கிழக்கு மெல்பேர்னில் (South-East Melbourne) உள்ள வீடொன்றினுள் அத்துமீறிப் பிரவேசித்து, அங்கிருந்த முதியவரைத் தாக்கி, உடமைகளுக்குச் சேதம் விளைவித்து, காரைக் கடத்திச் சென்ற குற்றச்சாட்டில் மூன்று சிறுவர்கள் கைது செய்யப்பட்டுள்ளனர்.
சம்பவ விபரம்: இன்று (17) அதிகாலை 3.30 மணியளவில், பெரிய கத்திகளுடன் ஆயுதம் ஏந்திய மூன்று சிறுவர்கள், வீட்டின் முன்பக்க ஜன்னலை உடைத்து உள்ளே நுழைந்துள்ளனர். அங்கு வசித்து வந்த 75 வயது முதியவரை பயமுறுத்தி, அவர் மீது தாக்குதல் நடத்தியுள்ளனர். இத்தாக்குதலில் சிறு காயமடைந்த முதியவர் மருத்துவமனையில் அனுமதிக்கப்பட்டுள்ளார். அதே வீட்டில் இருந்த 69 வயது பெண்ணுக்கு எவ்வித காயமும் ஏற்படவில்லை.
கைது மற்றும் குற்றச்சாட்டு: சந்தேகநபர்கள் மூவரும், 13, 15 மற்றும் 16 வயதுடைய சிறுவர்கள் எனவும், அவர்கள் Casey மற்றும் Greater Dandenong பகுதிகளைச் சேர்ந்தவர்கள் எனவும் பொலிஸார் தெரிவித்தனர். இவர்கள் வீட்டிலிருந்த காரைக் கடத்திச் சென்றுள்ளனர். அவர்கள் சம்பவ இடத்திற்கு வந்த கார் மற்றும் இரண்டு கத்திகளைப் பொலிஸார் கைப்பற்றியுள்ளனர்.
இந்தத் திடீர் மற்றும் சந்தர்ப்பவாதக் குற்றச் செயல் (sudden and opportunistic crime) தொடர்பாக, வீடுபுகுந்து தாக்குதல் நடத்தல் (aggravated burglary) மற்றும் திருட்டு ஆகிய குற்றச்சாட்டுகளின் பேரில் மூன்று சிறுவர்களும் நீதிமன்றத்தில் ஆஜர்படுத்தப்படவுள்ளனர்.
