கிரிந்த மணல் அகழ்வு வழக்கு: ராஜித சேனாரத்ன மீது மேல் நீதிமன்றில் குற்றப்பத்திரிகை தாக்கல் செய்யப்படவுள்ளது!

கொழும்பு: கிரிந்த மீன்பிடித் துறைமுகத்தில் மணல் அகழ்வுத் திட்டத்தை வழங்கியதில் இடம்பெற்றதாகக் கூறப்படும் ஊழல் தொடர்பில், முன்னாள் அமைச்சர் ராஜித சேனாரத்ன மற்றும் மேலும் இருவருக்கு எதிராக, மேல் நீதிமன்றத்தில் குற்றப்பத்திரிகை தாக்கல் செய்யவுள்ளதாக, இலஞ்ச ஊழல் ஆணைக்குழு நேற்று (26) கொழும்பு நீதவான் நீதிமன்றத்திற்கு அறிவித்தது. சட்ட நடைமுறைகளை மீறி, கொரிய நிறுவனம் ஒன்றுக்கு இந்தத் திட்டத்தை வழங்கியதன் மூலம், அரசாங்கத்திற்கு 26 மில்லியன் ரூபாய்க்கும் (2.6 கோடி) அதிகமான நட்டத்தை ஏற்படுத்தியதாக இவர்கள் மீது குற்றம் சாட்டப்பட்டுள்ளது. இந்த ஊழல் குற்றச்சாட்டு தொடர்பான விசாரணைகள் நிறைவடைந்த பின்னர், மேல் நீதிமன்றத்தில் குற்றப்பத்திரிகை தாக்கல் செய்யப்படும் என ஆணைக்குழுவின் அதிகாரிகள் தெரிவித்தனர். இந்த வழக்கில், இலங்கை மீன்பிடித் துறைமுகக் கூட்டுத்தாபனத்தின் முன்னாள் தலைவர் உபாலி லியனகே என்பவரும் பிரதிவாதியாகப் பெயரிடப்பட்டுள்ளார். பிரதிவாதிகள் இருவரும் பிணையில் விடுவிக்கப்பட்டுள்ள நிலையில், வழக்கு மீண்டும் ஜனவரி 30ஆம் திகதி விசாரணைக்கு எடுத்துக்கொள்ளப்படவுள்ளது.