கொழும்பு, ஒக்டோபர் 20 – வொஷிங்டன் டி.சி.யில் ஒக்டோபர் 13 முதல் 18 வரை நடைபெற்ற 2025 ஆம் ஆண்டுக்கான உலக வங்கி குழு / சர்வதேச நாணய நிதியத்தின் (IMF) வருடாந்தக் கூட்டங்களில், இலங்கை மத்திய வங்கியின் (CBSL) ஆளுநர் கலாநிதி நந்தலால் வீரசிங்க தலைமையிலான இலங்கைக் குழுவினர் தீவிரமாகப் பங்கேற்றனர்.
இந்த உயர்மட்ட சந்திப்புகளின் போது, இலங்கையின் தற்போதைய பொருளாதார சீர்திருத்த முயற்சிகளுக்கு வலுவான சர்வதேச ஆதரவு கிடைத்துள்ளதாக மத்திய வங்கி அறிக்கை வெளியிட்டுள்ளது.
சர்வதேசத் தலைவர்களுடனான சந்திப்புகள்
ஆளுநர் கலாநிதி நந்தலால் வீரசிங்க, தனது பங்கேற்பின் போது, சர்வதேச நாணய நிதியத்தின் முகாமைத்துவப் பணிப்பாளர், உலக வங்கிக் குழுமத்தின் தலைவர், இரு நிறுவனங்களினதும் சிரேஷ்ட அதிகாரிகள் மற்றும் அமெரிக்க திறைசேரியின் பிரதிநிதிகளைச் சந்தித்துப் பேச்சுவார்த்தை நடத்தினார்.
மத்திய வங்கி மற்றும் நிதி அமைச்சின் சிரேஷ்ட அதிகாரிகளை உள்ளடக்கிய இந்தக் குழுவினரின் சந்திப்புகளின் போது, இலங்கையின் சீர்திருத்தங்கள் பரவலான அங்கீகாரத்தைப் பெற்றன. குறிப்பாக, நாட்டின் “முன்னெச்சரிக்கையான பேரியல் பொருளாதார முகாமைத்துவம்” (prudent macroeconomic management), சிறந்த நிதி மற்றும் நாணயக் கொள்கைகள், நிதி அமைப்பின் ஸ்திரத்தன்மையைப் பாதுகாக்கும் முயற்சிகள், பலப்படுத்தப்பட்ட சமூகப் பாதுகாப்பு வலைகள் மற்றும் ஆளுமையில் தொடர்ச்சியான மேம்பாடுகள் ஆகியவற்றுக்குப் பாராட்டுத் தெரிவிக்கப்பட்டது.
புதிய முதலீடுகள் மற்றும் கடன் மறுசீரமைப்பு
பல்தரப்பு மற்றும் இருதரப்புக் கூட்டாளிகளுடனான கலந்துரையாடல்கள், உட்கட்டமைப்பு, எரிசக்தி மற்றும் டிஜிட்டல் மயமாக்கல் ஆகியவற்றில் அபிவிருத்தி ஒத்துழைப்பை மேம்படுத்துவதில் கவனம் செலுத்தின. அத்துடன், திறன் மேம்பாட்டிற்கான புதிய நிதியுதவி மற்றும் தொழில்நுட்ப உதவியைப் பெறுவதிலும் சிறப்புக் கவனம் செலுத்தப்பட்டது.
இலங்கைக் குழுவினர், கடன் தர மதிப்பீட்டு நிறுவனங்களுடனும் (sovereign credit rating agencies) ஆக்கபூர்வமாக ஈடுபட்டனர். பொருளாதார மீட்சி மற்றும் சீர்திருத்த மைல்கற்கள் குறித்த புதுப்பித்தல்களை வழங்கியமை, சந்தை நம்பிக்கையை வலுப்படுத்த உதவியது.
அமெரிக்க வர்த்தக சம்மேளனம் (US Chamber of Commerce) மற்றும் முதலீட்டாளர் மன்றங்களில் தீவிரமாகப் பங்கேற்றமை, வெளிப்படைத்தன்மை மற்றும் முதலீட்டு மேம்பாடு ஆகியவற்றில் இலங்கையின் அர்ப்பணிப்பை வெளிச்சம் போட்டுக் காட்டியது.
GSDR மாநாட்டில் இலங்கையின் நிலைப்பாடு
உலகளாவிய அரச கடன் வட்டமேசை (GSDR) மாநாட்டில் பேசிய இலங்கை, தனது கடன் மறுசீரமைப்பு “முடிவடையும் தருவாயில்” (near completion) உள்ளதையும், IMF திட்டத்தின் சமீபத்திய மைல்கற்களையும் வலியுறுத்தியது.
ஆளுநர் கலாநிதி வீரசிங்க, காலத்தே செய்யப்படும் மறுசீரமைப்பு, வெளிப்படைத்தன்மை மற்றும் நீடித்த சீர்திருத்தத்தின் முக்கியத்துவத்தை அடிக்கோடிட்டுக் காட்டினார்.
ஆளுநருக்கு ‘A Grade’ விருது
இந்த வாரத்தின் சிறப்பம்சமாக, “Global Finance Magazine” சஞ்சிகையால் நடத்தப்பட்ட 2025 ஆம் ஆண்டின் உலகின் சிறந்த வங்கி விருது வழங்கும் விழாவில், கலாநிதி நந்தலால் வீரசிங்க அவர்களுக்கு மதிப்புமிக்க “A Grade” விருது வழங்கி கௌரவிக்கப்பட்டது.
மதிநுட்பமான நாணயக் கொள்கை, நிதி அமைப்பின் மேற்பார்வை மற்றும் சவாலான உலகளாவிய நிலைமைகளில் மத்திய வங்கிக்கு அவர் வழங்கிய தலைமைத்துவம் ஆகியவற்றை அங்கீகரிக்கும் வகையில் இந்த உயரிய விருது வழங்கப்பட்டுள்ளது.
இந்த சந்திப்புகளின் ஒட்டுமொத்த விளைவுகள், இலங்கையின் சீர்திருத்தப் பாதையில் சர்வதேச சமூகத்தின் நம்பிக்கையை அடிக்கோடிட்டுக் காட்டுவதாக மத்திய வங்கி மேலும் குறிப்பிட்டுள்ளது.
