கொழும்பு, ஜனவரி 13: ‘டிட்வா’ (Ditwah) சூறாவளியால் பாதிக்கப்பட்ட மக்களுக்கு உதவுவதற்காக, அமெரிக்கா மேலதிகமாக 2 மில்லியன் டாலர் (சுமார் 600 மில்லியன் இலங்கை ரூபா) மனிதாபிமான உதவியை அறிவித்துள்ளது. இதன் மூலம், இலங்கையின் இடர் மீட்புப் பணிகளுக்காக அமெரிக்கா வழங்கிய மொத்த உதவித் தொகை 4 மில்லியன் டாலராக உயர்ந்துள்ளது.
தூதுவர் ஜூலி சங் கருத்து: இலங்கைக்கான அமெரிக்கத் தூதுவர் ஜூலி சங் (Julie Chung) இது குறித்துக் கூறுகையில், “இலங்கை மக்கள் உதவிக்காகக் காத்திருந்தபோது, அமெரிக்கா உடனடியாகக் கரம் நீட்டியது. ஆரம்பகட்ட வான்வழிப் போக்குவரத்து உதவிகள் (Airlift) முதல் தற்போது வழங்கப்பட்டுள்ள 4 மில்லியன் டாலர் நிதியுதவி வரை, எமது இந்தோ-பசிபிக் பங்காளி நாட்டுடன் நாங்கள் உறுதியாக நிற்கிறோம். மக்கள் மற்றும் பொருளாதாரம் மீண்டும் முன்னோக்கிச் செல்ல, ஸ்திரத்தன்மையை உருவாக்க அமெரிக்கா தொடர்ந்து உதவும்,” என்று தெரிவித்தார்.
யார் யாருக்கு உதவி? இந்த நிதியுதவியானது அம்பாறை, பதுளை, கம்பஹா, கேகாலை, புத்தளம் மற்றும் இரத்தினபுரி ஆகிய கடுமையாகப் பாதிக்கப்பட்ட மாவட்டங்களுக்கும், மத்திய மாகாணத்தில் உள்ள பெருந்தோட்டப் பகுதிகளுக்கும் (Estate communities) பயன்படுத்தப்படவுள்ளது.
என்னென்ன உதவிகள்?
- அவசர உணவுப் பொருட்கள், சமையல் பாத்திரங்கள் மற்றும் சுகாதாரப் பொருட்கள் (Hygiene kits).
- வெள்ளத்தைத் தடுக்க மணல் மூட்டைகளுக்குத் தேவையான பைகள் (Polysacks).
- சுத்தமான குடிநீர், தாய்-சேய் ஊட்டச்சத்து ஆதரவு.
- பாதிக்கப்பட்ட கிராமப்புற மற்றும் தோட்டப்புறங்களில் அடிப்படை உட்கட்டமைப்பு, வடிகால் மற்றும் சிறிய நீர்ப்பாசனக் கால்வாய்களைச் சீரமைத்தல்.
இந்த உதவித் திட்டங்கள் உலக உணவுத் திட்டம் (WFP) மற்றும் வேர்ல்ட் விஷன் (World Vision) போன்ற நம்பகமான அமைப்புகள் ஊடாக நடைமுறைப்படுத்தப்படும் எனத் தூதரகம் தெரிவித்துள்ளது.
