இலங்கை அருகே இந்தியப் பெருங்கடலில் ஈரானிய கடற்படை கப்பலை மூழ்கடித்த அமெரிக்க அணுசக்தி நீர்மூழ்கிக் கப்பலில் மூன்று ஆஸ்திரேலியர்கள் இருந்ததாக ஆஸ்திரேலியப் பிரதமர் அந்தோனி அல்பானீஸ் தெரிவித்துள்ளார். ஸ்கை நியூஸ் (Sky News) செய்தி நிறுவனத்திற்கு அளித்த பேட்டியில் அவர் இதனை அதிகாரப்பூர்வமாக உறுதிப்படுத்தினார்.
“தேசிய பாதுகாப்பு மற்றும் பொதுமக்களின் நலன் கருதி, அந்த நீர்மூழ்கிக் கப்பலில் மூன்று ஆஸ்திரேலியர்கள் இருந்ததை நான் உறுதிப்படுத்துகிறேன். அதேவேளை, ஈரானுக்கு எதிரான எந்தவொரு தாக்குதல் நடவடிக்கையிலும் ஆஸ்திரேலியர்கள் நேரடியாகப் பங்கேற்கவில்லை,” என்று அல்பானீஸ் கூறினார். AUKUS எனப்படும் ஆஸ்திரேலியா, இங்கிலாந்து மற்றும் அமெரிக்கா இடையிலான முத்தரப்பு ராணுவ ஒப்பந்தத்தின் ஒரு பகுதியாக, கூட்டாளி நாடுகளின் ராணுவத்துடன் இணைந்து அவர்கள் “அனுபவம் பெற்று வந்ததாக” அவர் மேலும் விளக்கினார்.
ஈரானிய கடற்படைக்குச் சொந்தமான ஐஆர்ஐஎஸ் தேனா (IRIS Dena) போர்க்கப்பல் மீது அமெரிக்கா நடத்திய இந்த திடீர் தாக்குதலில் குறைந்தது 87 ஈரானிய மாலுமிகள் உயிரிழந்தனர் மற்றும் 32 பேர் மீட்கப்பட்டுள்ளனர். அமெரிக்காவின் இந்தத் தாக்குதலுக்குப் பிறகு பல மாலுமிகள் இன்னும் காணவில்லை என செய்திகள் தெரிவிக்கின்றன.
எமது Facebook பக்கத்தைப் பின்தொடர இங்கே கிளிக் செய்யவும்.
