உலகப் பொருளாதார மன்ற மாநாட்டை முடித்துக்கொண்டு பிரதமர் நாடு திரும்பினார்! – டாவோஸ் பயணத்தின் முழு விபரங்கள்.

கொழும்பு, ஜனவரி 23: சுவிட்சர்லாந்தின் டாவோஸ் நகரில் நடைபெற்ற 56-வது உலகப் பொருளாதார மன்ற (WEF) வருடாந்த மாநாட்டில் பங்கேற்ற பிரதமர் கலாநிதி ஹரிணி அமரசூரிய (Dr. Harini Amarasuriya) இன்று (23) காலை நாடு திரும்பினார்.

ஜனவரி 19 முதல் 22 வரை நடைபெற்ற இந்த மாநாட்டின் போது, இலங்கையின் எதிர்காலப் பொருளாதாரப் பாதையைப் பலப்படுத்தும் நோக்கில் உலகின் முன்னணித் தலைவர்கள், சர்வதேச நிதி நிறுவனங்களின் தலைவர்கள் மற்றும் வணிகப் பிரமுகர்களுடன் பிரதமர் விரிவான பேச்சுவார்த்தைகளை நடத்தினார்.

இந்த விஜயத்தில், தொழில் அமைச்சரும், நிதி மற்றும் திட்டமிடல் பிரதி அமைச்சருமான கலாநிதி அனில் ஜயந்த பெர்னாண்டோ (Dr. Anil Jayantha Fernando) உள்ளிட்ட உயர்மட்டக் குழுவினரும் பிரதமருடன் இணைந்திருந்தனர்.

பயணத்தின் முக்கிய சிறப்பம்சங்கள்:

1. பொருளாதார ஸ்திரத்தன்மைக்கான சந்திப்புகள்:

• சர்வதேச நாணய நிதியத்தின் (IMF) முகாமைத்துவப் பணிப்பாளர் கிறிஸ்டலினா ஜார்ஜீவா (Kristalina Georgieva) மற்றும் ஆசிய அபிவிருத்தி வங்கியின் (ADB) தலைவர் மசாடோ கண்டா (Masato Kanda) ஆகியோரைச் சந்தித்து, இலங்கையின் நிதியியல் ஸ்திரத்தன்மைக்குத் தேவையான ஒத்துழைப்புகள் குறித்துக் கருத்துக்களைப் பரிமாறிக்கொண்டார்.

2. சர்வதேச உறவுகளைப் பலப்படுத்தல்:

• சிங்கப்பூர் ஜனாதிபதி தர்மன் சண்முகரத்தினம் (Tharman Shanmugaratnam).
• ஐரோப்பிய ஆணைக்குழுவின் தலைவர் உர்சுலா வான் டெர் லேயன் (Ursula von der Leyen).
• UNDP நிர்வாகி அலெக்சாண்டர் டி குரூ (Alexander De Croo). ஆகியோரைச் சந்தித்து, இலங்கையின் மீதான சர்வதேச நம்பிக்கையை வலுப்படுத்தினார்.

3. உலக மேடையில் இலங்கையின் குரல்:

• ‘உலக மகளிர் டாவோஸ் 2026’ (World Women Davos Agenda) நிகழ்வில் சிறப்புரையாற்றிய பிரதமர், இலங்கையின் கொள்கை நிலைப்பாட்டை விளக்கினார்.
• வளர்ந்து வரும் சந்தைகளில் வேலைவாய்ப்பு நெருக்கடி மற்றும் திறன் மேம்பாடு குறித்த உயர்மட்டக் குழு விவாதங்களிலும் பங்களிப்பை வழங்கினார்.
• உலக சுற்றுலா மன்றத்தில் (Global Tourism Forum) கலந்துகொண்டு இலங்கையின் சுற்றுலாத் துறையை மேம்படுத்துவதற்கான நடவடிக்கைகளை மேற்கொண்டார்.

4. முதலீடு மற்றும் தொழிற்பயிற்சி:

• முதலீட்டு வாய்ப்புகளை விரிவுபடுத்தும் நோக்கில், ‘ஏபி முல்லர்-மெர்ஸ்க்’ (AP Moller-Maersk) உள்ளிட்ட பன்னாட்டு நிறுவனங்களின் தலைவர்கள் மற்றும் சுவிஸ் வர்த்தக சமூகத்தினருடன் கலந்துரையாடினார்.
• சுவிட்சர்லாந்தில் உள்ள தொழிற்பயிற்சி நிறுவனங்களைப் பார்வையிட்டதுடன், அங்கு வசிக்கும் இலங்கைத் தொழில்முனைவோரையும் சந்தித்து நாட்டின் வளர்ச்சிக்கான அவர்களின் பங்களிப்பு குறித்துப் பேசினார்.