ஐபிஎல் திருவிழா ஒவ்வொரு ஆண்டும் புதுப்புது திறமைகளை அறிமுகப்படுத்தினாலும், சில ஜாம்பவான்களின் ஆட்டத்தைக் காணவே மைதானங்கள் நிறையும். ஆனால், காலம் யாரையும் விடுவதில்லை. 2026 ஐபிஎல் சீசன், கிரிக்கெட் ரசிகர்களுக்கு ஒரு உணர்ச்சிகரமான ஆண்டாக அமையப்போகிறது. ஏனெனில், பல ஆண்டுகளாக நம்மை மகிழ்வித்து வந்த 5 முக்கிய நட்சத்திர வீரர்கள், இந்த சீசனுடன் ஐபிஎல்-க்கு ‘குட்பை’ சொல்ல அதிக வாய்ப்புள்ளதாகக் கருதப்படுகிறது.
சென்னை சூப்பர் கிங்ஸ் அணியின் முன்னாள் கேப்டன் மகேந்திர சிங் தோனி முதல், கொல்கத்தா நைட் ரைடர்ஸ் அணியின் தற்போதைய கேப்டன் அஜிங்கியா ரஹானே வரை, அந்தப் பட்டியலில் யார் யார் இருக்கிறார்கள் என்று பார்ப்போம்.
1. ‘தல’ மகேந்திர சிங் தோனி (MS Dhoni)
44 வயதாகும் தோனிக்கு, கால் முட்டிப் பகுதியில் நீண்ட நாட்களாகப் பிரச்சனை இருந்து வருகிறது. இதனால், அவரால் பழையபடி துடிப்பாக விளையாட முடியாத சூழல் நிலவுகிறது. கடந்த இரண்டு சீசன்களில் கூட, ஆட்டத்தின் கடைசி 10-15 பந்துகள் மீதமிருக்கும்போதுதான் அவர் களம் இறங்கினார். ரசிகர்களுக்காகவே விளையாடி வரும் தோனி, ஐபிஎல் 2026 தொடருக்குப் பிறகு தனது ஓய்வை அதிகாரப்பூர்வமாக அறிவிப்பார் எனத் தெரிகிறது. இருப்பினும், சிஎஸ்கே (CSK) அணியுடனான அவரது பந்தம் முடிவுக்கு வராது; அவர் அணியின் ஆலோசகராக (Mentor) தொடர்ந்து செயல்படுவார் என்று கூறப்படுகிறது.
2. சுனில் நரைன் (Sunil Narine)
கொல்கத்தா நைட் ரைடர்ஸ் (KKR) அணியின் தூண்களாக விளங்கிய ஆண்ட்ரே ரஸல் மற்றும் சுனில் நரைன் ஜோடியில், ரஸல் கடந்த சீசனுடன் ஓய்வு பெற்றுவிட்டார். இப்போது நரைனும் அதே பாதையைப் பின்பற்ற உள்ளார். ஐபிஎல் 2026 சீசனுடன் ஓய்வு பெற்றுவிட்டு, கேகேஆர் அணியின் பயிற்சியாளர் குழுவில் (Coaching Staff) இணைந்து புதிய பொறுப்பை ஏற்க அவருக்கு அதிக வாய்ப்புகள் இருப்பதாகக் கருதப்படுகிறது.
3. அஜிங்கியா ரஹானே (Ajinkya Rahane)
தற்போது கொல்கத்தா நைட் ரைடர்ஸ் அணியின் கேப்டனாக இருக்கும் அஜிங்கியா ரஹானேவுக்கு, ஐபிஎல் 2026 சீசனுக்குப் பிறகு கேப்டன் பதவி நீட்டிக்கப்படாது எனத் தெரிகிறது. அவரது தற்போதைய பேட்டிங் ஃபார்ம் மற்றும் அணியின் எதிர்காலத் திட்டங்களைக் கருத்தில் கொண்டு, அவர் கேப்டனாக இருந்தால் மட்டுமே ‘பிளேயிங் 11’-ல் இடம் கிடைக்கும் என்ற நிலை உள்ளது. கேப்டன் பதவி பறிக்கப்பட்டால், ரஹானே ஓய்வு அறிவிப்பதைத் தவிர வேறு வழியில்லை என்றே தோன்றுகிறது.
4. இஷாந்த் சர்மா (Ishant Sharma)
ஐபிஎல் 2025 சீசனில், குஜராத் டைடன்ஸ் (GT) அணிக்காக விளையாடிய இஷாந்த் சர்மா, 7 போட்டிகளில் வெறும் 4 விக்கெட்டுகளை மட்டுமே வீழ்த்தினார். வயதின் காரணமாக அவரால் பழையபடி அதிவேகமாகப் பந்துவீச முடியவில்லை. மேலும், ஆட்டத்தின் சூழலுக்கு ஏற்றவாறு பந்துவீச்சில் அதிக வேரியேஷன்களையும் (Variations) காட்டத் தவறி வருகிறார். இதனால், ஐபிஎல் 2026 சீசனுடன் அவர் ஓய்வுபெறவே அதிக வாய்ப்புள்ளது.
5. மார்கஸ் ஸ்டாய்னிஸ் (Marcus Stoinis)
பஞ்சாப் கிங்ஸ் (PBKS) அணியில், 11 கோடி ரூபாய் என்ற மிகப்பெரிய தொகைக்குத் தக்கவைக்கப்பட்டுள்ள மார்கஸ் ஸ்டாய்னிஸ், சமீப காலமாகவே நல்ல ஃபார்மில் இல்லை. ஐபிஎல் 2026 சீசனிலும் அவர் சொதப்பினால், அடுத்த சீசனுக்கு முன் அணி அவரை விடுவித்துவிடும் (Release) என்பதில் சந்தேகமில்லை. அவர் ஃபார்ம் அவுட்டில் இருப்பதாலும், அவரது வயது காரணமாகவும், அவரை அடுத்த ஐபிஎல் ஏலத்தில் எந்த அணியும் வாங்க முன்வராது எனக் கருதப்படுகிறது. எனவே, அவருக்கும் இதுவே கடைசி சீசனாக அமையக்கூடும்.
இந்த ஐபிஎல் ஜாம்பவான்கள் மைதானத்தில் ஆடுவதை நாம் கடைசியாகப் பார்க்கப்போகும் சீசன் இதுவாக இருக்கலாம். எனவே, 2026 ஐபிஎல் ஒவ்வொரு ரசிகருக்கும் மிகவும் சிறப்பானதாகவும், உணர்ச்சிகரமானதாகவும் அமையும் என்பதில் சந்தேகமில்லை.
