ஈரான் நாட்டின் முன்னாள் தலைவரான அயதுல்லா அலி கமேனியின் இறுதிச் சடங்கில் கலந்துகொண்ட ஹவுதி படையினரின் தலைவர்களை, பழைய பழியைத் தீர்க்கும் நோக்கில் விமானத்திலேயே மொத்தமாகத் கொல்ல சவூதி அரேபியா திட்டமிட்ட முயற்சி தோல்வியடைந்தது. இந்த அதிரடித் திருப்பத்தைத் தொடர்ந்து, தற்போது ஹவுதி படையினருக்கும் சவூதி அரேபியாவுக்கும் இடையே மீண்டும் ஒரு முழு அளவிலான கோரப்போர் வெடித்துள்ளதாக அரசியல் வட்டாரங்கள் தெரிவிக்கின்றன.
இந்த விவகாரம் குறித்து மேலும் அறியப்படுகையில், இந்த மோதலில் யாருக்கு வெற்றி கிடைக்கும் என்பதைத் தாண்டி, இதனால் வளைகுடா பிராந்தியத்தில் ஏற்பட்டுள்ள பேரழிவுகள் மற்றும் பொருளாதாரச் சரிவுகள் உலக நாடுகளைக் கவலையில் ஆழ்த்தியுள்ளன. ஹவுதி படைகள் கடந்த 2 மாதங்களாக எண்ணெய் கட்டமைப்புகளை மட்டுமே குறிவைத்து தாக்கி வந்த நிலையில், தற்போது பொதுமக்கள் மற்றும் வணிகப் பயணங்கள் நடமாடும் மிக முக்கியமான உள்கட்டமைப்புகளைக் குறிவைக்கத் தொடங்கியுள்ளன.
இதன் உச்சகட்டமாக, கடந்த வாரம் சவூதி அரேபியாவின் தலைநகர் ரியாத்தில் அமைந்துள்ள புகழ்பெற்ற கிங் காலித் சர்வதேச விமான நிலையத்தின் மீது ஹவுதி படைகள் மிகப் பயங்கரமான வான்வழித் தாக்குதலை நடத்தின. இந்தத் தாக்குதலில் இதுவரை 12 பேர் பரிதாபமாக உயிரிழந்துள்ளதாகவும், 300-க்கும் மேற்பட்டோர் படுகாயமடைந்துள்ளதாகவும் தகவல்கள் வெளியாகியுள்ளன.
குறிப்பாக, சனிக்கிழமை அன்று நடத்தப்பட்ட ஏவுகணைத் தாக்குதலில் மட்டும் 4 சவூதி அரேபியர்களும், 2 பங்களாதேஷ் நாட்டினரும் கொல்லப்பட்டுள்ளதாக சவூதி ஜெனரல் அத்தாரிட்டி ஆப் சிவில் ஏவியேஷன் அமைப்பு அதிகாரப்பூர்வமாக அறிவித்துள்ளது. கடந்த ஒரு வாரமாக தொடர்ந்து நடந்து வரும் இந்தத் தாக்குதல்களில் சவூதி குடிமக்கள் மட்டுமல்லாமல், அமெரிக்கா, ஜோர்தான், பாலஸ்தீனம், சிரியா, சூடான் மற்றும் எகிப்து ஆகிய நாடுகளைச் சேர்ந்த வெளிநாட்டினரும் உயிரிழந்துள்ளதாக விமான போக்குவரத்து அமைப்பு தெரிவித்துள்ளது. மேலும், காயமடைந்த 309 பேரில் பலர் மருத்துவமனைகளில் அதிதீவிர சிகிச்சைப் பிரிவில் கவலைக்கிடமான நிலையில் போராடி வருவதால், பலி எண்ணிக்கை மேலும் அதிகரிக்கக்கூடும் என்று அஞ்சப்படுகிறது.
சனிக்கிழமை நடத்தப்பட்ட தாக்குதலுடன் சேர்த்து, கடந்த ஒரு வாரத்திற்குள் மட்டும் சுமார் 3 முறை கிங் காலித் சர்வதேச விமான நிலையம் ஹவுதி படைகளால் குறிவைக்கப்பட்டுள்ளது. இதனால் விமான நிலையத்தின் பல பகுதிகள் உருக்குலைந்து, பெருமளவிலான பொருட்சேதம் ஏற்பட்டுள்ளது. ஏற்கனவே ஏர் இந்தியா போன்ற முன்னணி விமான நிறுவனங்கள் ரியாத்திற்கான விமான சேவைகளைத் தற்காலிகமாக நிறுத்தி வைத்துள்ள நிலையில், தற்போது இந்த விமான நிலையம் முற்றிலுமாக மூடப்பட்டுள்ளது. தாக்குதல் நேரத்தில் எடுக்கப்பட்ட பதறவைக்கும் வீடியோக்கள் இணையத்தில் வைரலாகி வருவதால், சவூதி மக்கள் பெரும் அச்சத்திலும் பீதியிலும் உறைந்துள்ளனர்.
சவூதி அரேபியாவுக்கும் ஹவுதி படையினருக்கும் இடையிலான மோதல் பல தசாப்தங்களாகத் தொடர்ந்தாலும், கடந்த 2015ஆம் ஆண்டுக்குப் பிறகு போர்ப்பதற்றம் தணிந்து, 2022ஆம் ஆண்டில் வரலாற்றுச் சிறப்புமிக்க அமைதி ஒப்பந்தம் எட்டப்பட்டது. இதனால் யெமன் நாட்டில் செயல்படும் ஹவுதி படைகளும், சவூதி அரேபியாவும் தாக்குதல்களை முழுமையாக நிறுத்தி வைத்திருந்தன.
ஆனால், கடந்த ஜூலை 13ஆம் தேதியன்று, சவூதி அரேபியாவின் நேரடி ஆதரவு பெற்ற யெமன் அரசின் படைகள், ஹவுதியின் முக்கிய அதிகாரிகள் மற்றும் தலைவர்கள் பயணம் செய்த விமானத்தைத் தாக்கி அழிக்க ரகசிய முயற்சி மேற்கொண்டன. இந்தச் செயல்தான் 2022ஆம் ஆண்டு எட்டப்பட்ட அமைதி ஒப்பந்தத்தை அடியோடு தகர்த்துவிட்டதாக ஹவுதி தரப்பு ஆவேரமாக அறிவித்தது. இதன் காரணமாகவே தற்போது யெமன் நாட்டிலும், சவூதி அரேபியாவிலும் ஹவுதி படைகள் இடைவிடாத கடுமையான தாக்குதல்களை நடத்தி வருகின்றன.
இதற்கிடையில், அப்பாவி மக்கள் மற்றும் பயணிகள் பயன்படுத்தும் கிங் காலித் சர்வதேச விமான நிலையம் மீது ஹவுதி படைகள் நடத்திய இந்தத் தாக்குதல் அப்பட்டமான ‘போர்க் குற்றம்’ என சவூதி தலைமையிலான யெமன் ராணுவம் கடும் கண்டனம் தெரிவித்துள்ளது. இதற்கு மிக விரைவில் தக்க பதிலடி கொடுக்கப்படும் என்றும் சவூதி தரப்பு எச்சரித்துள்ளதால், வளைகுடா பிராந்தியத்தில் போர் மேகங்கள் சூழ்ந்துள்ளன.
