யாழ்ப்பாணம் நல்லூர் கந்தசுவாமி ஆலயத்தின் பின்புறத்தில் வைக்கப்பட்டிருந்த முன்னாள் எல்.ரி.ரி.ஈ (LTTE) உறுப்பினர் திலீபனின் சிலையை பொலிஸார் அகற்றியதைக் கண்டித்து, இன்று (27) யாழ்ப்பாணத்தில் பாரிய போராட்டமொன்று இடம்பெற்றது. இப்போராட்டத்தில் இலங்கைத் தமிழரசுக் கட்சி (ITAK) நாடாளுமன்ற உறுப்பினர் சிவஞானம் சிறீதரனும் கலந்துகொண்டார்.
1987ஆம் ஆண்டு இந்திய அமைதி காக்கும் படையினருக்கு எதிராக உண்ணாவிரதப் போராட்டம் நடத்தி உயிரிழந்த திலீபனை நினைவுகூரும் முகமாக, சில குழுக்களினால் கடந்த சில நாட்களுக்கு முன்னர் நல்லூர் பகுதியில் இந்தச் சிலை நிறுவப்பட்டிருந்தது. இந்நிலையில், இன்று காலை பொலிஸாரினால் குறித்த சிலை அகற்றப்பட்டது.
இதற்கு எதிர்ப்புத் தெரிவித்து நடைபெற்ற ஆர்ப்பாட்டத்தில், சிறீதரன் எம்.பியுடன் பல சிவில் சமூக அமைப்புகளும் கலந்துகொண்டு தமது கண்டனத்தை வெளியிட்டன.
இந்தச் சம்பவம் குறித்து வினவியபோது, பொலிஸார் பின்வருமாறு விளக்கமளித்தனர்:
“குறித்த நினைவிடத்தை அங்கே வைத்திருப்பதற்கு நேற்று (26) வரை மாத்திரமே அனுமதி வழங்கப்பட்டிருந்தது. அனுமதி காலம் முடிவடைந்ததாலேயே அது அகற்றப்பட்டது. மேலும், எல்.ரி.ரி.ஈ தலைவர்கள் தொடர்பான நினைவுச்சின்னங்கள் அல்லது நினைவேந்தல்களுக்குப் பயங்கரவாதத் தடைச் சட்டத்தின் கீழ் (Prevention of Terrorism Act – PTA) சட்ட ஏற்பாடுகள் பொருந்தும்,” என்று பொலிஸார் தெரிவித்தனர்.
இந்தச் சிலை நிறுவப்பட்ட விவகாரம் தொடர்பாக யாழ்ப்பாணம் நீதவான் நீதிமன்றத்தில் அறிக்கை சமர்ப்பிக்கப்படும் என்றும் பொலிஸார் மேலும் குறிப்பிட்டனர்.
