ஆசிய விளையாட்டுப் போட்டிகளின் ஆடவர் கிரிக்கெட்டில் மூன்றாம் இடத்துக்கான பரபரப்பான ஆட்டத்தில், பங்களாதேஷ் அணியை 63 ஓட்டங்களால் வீழ்த்தி இலங்கை அணி வரலாற்றுச் சிறப்புமிக்க வெண்கலப் பதக்கத்தை வென்று சாதனை படைத்துள்ளது.
முதலில் துடுப்பெடுத்தாடிய இலங்கை அணி, பங்களாதேஷின் சவாலான பந்துவீச்சை எதிர்கொண்டு, 20 ஓவர்களில் 9 விக்கெட்டுக்களை இழந்து 165 ஓட்டங்களைப் பெற்றது. அணித்தலைவர் சஹான் அரச்சிகே 33 ஓட்டங்கள் எடுத்து அணியை முன்நின்று வழிநடத்தினார். பங்களாதேஷ் தரப்பில் மெஹதி ஹசன், சைஃப் ஹசன், முஸ்தபிசுர் ரஹ்மான் ஆகியோர் தலா 2 விக்கெட்டுகளை வீழ்த்தினர்.
சவாலான 166 ஓட்டங்கள் என்ற இலக்குடன் களமிறங்கிய பங்களாதேஷ் அணி, இலங்கையின் நுட்பமான மற்றும் ஆக்ரோஷமான பந்துவீச்சுக்கு முன்னால் தடுமாறியது. தொடர்ச்சி…
இலங்கையின் அசத்தலான பந்துவீச்சில் பங்களாதேஷ் அணி 17.3 ஓவர்களில் 102 ஓட்டங்களுக்கு சுருண்டது. இலங்கை சார்பில் நுவன் துஷார, தரிந்து ரத்நாயக்க, விஜயகாந் வியாஸ்காந்த், வனுஜ சஹன் ஆகியோர் தலா 2 விக்கெட்டுகளை வீழ்த்தி அணியின் வெற்றிக்கு வித்திட்டனர்.
இந்த வெற்றியானது இலங்கை கிரிக்கெட் அணிக்கு ஒரு முக்கிய மைல்கல்லாகும். ஆசிய விளையாட்டுப் போட்டியில் வெண்கலப் பதக்கம் வென்றதன் மூலம், இலங்கை அணி தனது திறமையை மீண்டும் நிரூபித்துள்ளது. இந்த சாதனைக்காக இலங்கை அணிக்கு நாலாபுறமிருந்தும் பாராட்டுகள் குவிந்து வருகின்றன.
