அரிசிக்குச் செயற்கைத் தட்டுப்பாடு: விவசாயிகள் சங்கம் குற்றச்சாட்டு

கொழும்பு: ஒவ்வொரு பண்டிகைக் காலத்திலும், நாட்டின் அரிசி உற்பத்தியாளர்கள் வேண்டுமென்றே செயற்கையான தட்டுப்பாட்டை உருவாக்கி, விலையை அதிகரிப்பதாக, தேசிய விவசாயிகள் சங்கத்தின் தலைவர் அனுராத தென்னகோன் குற்றம் சாட்டியுள்ளார். இந்த விடயத்தில் அரசாங்கம் உரிய நடவடிக்கை எடுக்கத் தவறிவிட்டது எனவும் அவர் கடுமையாக விமர்சித்துள்ளார். “டட்லி போன்ற பெரும் உற்பத்தியாளர்களுக்கு முன்னால் அரசாங்கம் மௌனமாக இருக்கிறது. வர்த்தக அமைச்சரின் ஒரே தீர்வு அரிசி இறக்குமதியாக மட்டுமே உள்ளது,” எனத் தென்னகோன் குறிப்பிட்டார். விவசாயிகளிடமிருந்து கிலோ 80-112 ரூபாய்க்கு இடையில் கொள்வனவு செய்யப்படும் நெல்லிலிருந்து உற்பத்தி செய்யப்படும் அரிசி, மிக அதிக விலைக்கு நுகர்வோருக்கு விற்கப்படுவதாக அவர் சுட்டிக்காட்டினார். வர்த்தமானி அறிவித்தலின்படி, அரிசி விலையைக் கட்டுப்படுத்த அரசாங்கம் தனது அதிகாரத்தைப் பயன்படுத்த வேண்டும் எனவும் அவர் கோரிக்கை விடுத்தார். இந்த பொருளாதார நெருக்கடி குறித்து அவர் மேலும் பேசினார்.