கொழும்பு: முன்னாள் அமைச்சர் விமல் வீரவன்ச, அண்மையில் ஊடக சந்திப்பொன்றில் வெளியிட்ட கருத்துக்களை உறுதிப்படுத்த, அவரால் எந்த ஆதாரத்தையும் வழங்க முடியவில்லை என பொலிஸார் இன்று (10) தெரிவித்துள்ளனர்.
தங்காலை போதைப்பொருள் கடத்தல் சம்பவம் தொடர்பில், சந்தேகநபரான ‘பெலியட்ட சனா’ குறித்து விமல் வீரவன்ச வெளியிட்ட கருத்துக்கள் தொடர்பில் வாக்குமூலம் வழங்குவதற்காக, அவர் நேற்று (09) தங்காலை வலயக் குற்றப் புலனாய்வுப் பிரிவில் முன்னிலையாகியிருந்தார்.
பொலிஸாரிடம் விமல் வழங்கிய வாக்குமூலம்
தனது வாக்குமூலத்தில், வீரசிங்க சனத் (பெலியட்ட சனா) என்ற நபரை ஜேவிபியின் தீவிர உறுப்பினர் எனத் தனக்குத் தெரியாது என விமல் வீரவன்ச குறிப்பிட்டுள்ளதாக பொலிஸார் தெரிவித்தனர். மேலும்,
- “‘அரச அனுசரணையின் பேரில்’ போதைப்பொருள் கொண்டுவரப்படுவதாகத் கூறியது, நாட்டின் ஒட்டுமொத்த நிலைமை குறித்த ஒரு பொதுவான கருத்தே தவிர, இந்தக் குறிப்பிட்ட வழக்கைக் குறிவைத்தது அல்ல,” எனவும்,
- “சந்தேகநபரையும், போதைப்பொருள் படகையும் தொடர்புபடுத்தித் பேசியது, அக்காலத்தில் வெளியான ஊடகச் செய்திகளின் அடிப்படையிலேயே,” எனவும்,
- “ஜனாதிபதி, சந்தேகநபரின் வீட்டில் உணவருந்தவில்லை, மாறாக அப்பகுதியில் உள்ள ஹோட்டல் ஒன்றிலேயே உணவருந்தினார்,” எனவும்,
- “சந்தேகநபரான பெலியட்ட சனாவைக் கைது செய்வதில் ஏற்பட்ட தாமதம், அரச செல்வாக்கு அல்லது அனுசரணையின் காரணமாக ஏற்பட்டிருக்கலாம் எனத் நம்புவதாகவும்” அவர் தனது வாக்குமூலத்தில் குறிப்பிட்டுள்ளதாக பொலிஸார் மேலும் தெரிவித்தனர்.
பொலிஸாரின் முடிவு
இதன்படி, விமல் வீரவன்ச தனது ஊடக சந்திப்பில் வெளியிட்ட கருத்துக்களை உறுதிப்படுத்த, அவரால் எந்த ஆதாரத்தையும் வழங்க முடியவில்லை எனப் பொலிஸார் முடிவு செய்துள்ளனர். தொடரும் விசாரணைகளின்போது, ஏதேனும் தவறான அல்லது தவறாக வழிநடத்தும் தகவல்கள் வெளிவந்தால், அது குறித்து நீதிமன்றத்திற்கு அறிவிக்கப்பட்டு, சட்ட நடவடிக்கை எடுக்கப்படும் எனவும் பொலிஸார் எச்சரித்துள்ளனர்.
