கொழும்பு: நாட்டில் தற்போது நிலவும் “கீரி சம்பா” (Keeri Samba) அரிசிக்கான தட்டுப்பாட்டிற்கு தீர்வாக, 3,500 மெட்ரிக் தொன் “பொன்னி சம்பா” (Ponni Samba) அரிசி நாட்டிற்கு இறக்குமதி செய்யப்பட்டுள்ளதாக இலங்கை சுங்கம் தெரிவித்துள்ளது.
இறக்குமதி செய்யப்பட்ட அரிசியின் முதல் தொகுதி கடந்த ஒக்டோபர் 23ஆம் திகதி இலங்கைக்கு வந்தடைந்தது.
அதனைத் தொடர்ந்து, கடந்த வெள்ளி (ஒக். 24) மற்றும் சனிக்கிழமைகளிலும் (ஒக். 25) மேலதிக “பொன்னி சம்பா” அரிசித் தொகைகள் நாட்டிற்குக் கொண்டு வரப்பட்டதாக இலங்கை சுங்கம் உறுதிப்படுத்தியுள்ளது.
அமைச்சரவை அங்கீகாரம்
உள்ளூர் சந்தையில் “கீரி சம்பா” அரிசிக்கு நிலவும் தட்டுப்பாட்டைக் நிவர்த்தி செய்யும் நோக்கில், GR-11 ரக “பொன்னி சம்பா” அரிசியை ஒக்டோபர் 15 ஆம் திகதி முதல் இறக்குமதி செய்வதற்கு அமைச்சரவை அண்மையில் அங்கீகாரம் வழங்கியிருந்தது.
இந்த அங்கீகாரத்தைத் தொடர்ந்து, இறக்குமதியாளர்களுக்கு இறக்குமதிக் கட்டுப்பாட்டு அனுமதிப்பத்திரம் பெறுவதில் இருந்து அரசாங்கம் விலக்கு அளித்தது.
உணவுக் கொள்கை மற்றும் பாதுகாப்புக் குழுவின் (Food Policy and Security Committee) பரிந்துரைகளின் அடிப்படையில், ஒவ்வொரு இறக்குமதியாளரும் தலா 520 மெட்ரிக் தொன் அரிசியை இறக்குமதி செய்ய அனுமதிக்கப்பட்டமை குறிப்பிடத்தக்கது.
