பாகிஸ்தானை வீழ்த்தியது இந்தியா; ஆனால் கை குலுக்க மறுத்ததால் சர்ச்சை!

துபாய்: நேற்று (14) துபாயில் நடைபெற்ற ஆசியக் கிண்ணப் போட்டியில், பரம எதிரியான பாகிஸ்தானை இந்திய அணி 7 விக்கெட்டுகள் வித்தியாசத்தில் வீழ்த்தியது. இருப்பினும், போட்டிக்குப் பிறகு இந்திய வீரர்கள் கை குலுக்க மறுத்ததால், பெரும் சர்ச்சை எழுந்துள்ளது. முதலில் துடுப்பெடுத்தாடிய பாகிஸ்தான், இந்திய சுழற்பந்து வீச்சாளர்களின் தாக்குதலால் 20 ஓவர்களில் 9 விக்கெட் இழப்பிற்கு 127 ஓட்டங்களை மாத்திரமே எடுத்தது. பின்னர் ஆடிய இந்தியா, அபிஷேக் ஷர்மாவின் அதிரடியான 31 ஓட்டங்கள் மற்றும் கப்டன் சூர்யகுமார் யாதவின் ஆட்டமிழக்காத 47 ஓட்டங்கள் ஆகியவற்றின் உதவியுடன், 25 பந்துகள் மீதமிருக்க எளிதில் வெற்றி பெற்றது. “நாங்கள் அரசாங்கம் மற்றும் பிசிசிஐ-யின் நிலைப்பாட்டுடன் உடன்படுகிறோம்,” எனக் கூறி, கை குலுக்காததை இந்திய கப்டன் சூர்யகுமார் யாதவ் நியாயப்படுத்தினார். இந்த வெற்றியை இந்திய இராணுவத்திற்கு அவர் அர்ப்பணித்தார். ஆனால், இந்தியாவின் இந்த செயல் “விளையாட்டு உணர்வுக்கு எதிரானது,” எனக் கூறியுள்ள பாகிஸ்தான், போட்டி நடுவரிடம் உத்தியோகப்பூர்வமாக முறைப்பாடு செய்துள்ளது. இந்த சர்வதேச கிரிக்கெட் சர்ச்சை பெரும் பரபரப்பை ஏற்படுத்தியுள்ளது.