கொழும்பு:
சர்ச்சைக்குரிய ஸ்ரீலங்கன் ஏர்லைன்ஸ் எயார்பஸ் (Airbus) விமானக் கொள்வனவு விவகாரத்தில், முன்னாள் ஜனாதிபதி மஹிந்த ராஜபக்ஷவுக்கு மூன்று தடவைகளில் 60 மில்லியன் ரூபா வழங்கப்பட்டதாக அதன் முன்னாள் பிரதம நிறைவேற்று அதிகாரி கபில சந்திரசேன தெரிவித்துள்ளார். இந்த அதிர்ச்சித் தகவலை இலஞ்ச ஊழல் ஒழிப்பு ஆணைக்குழு (CIABOC) வியாழக்கிழமை (20) கொழும்பு நீதவான் நீதிமன்றத்தில் வெளிப்படுத்தியுள்ளது.
இந்த வழக்கின் சந்தேக நபராக உள்ள கபில சந்திரசேன அளித்த வாக்குமூலத்தின் அடிப்படையிலேயே இந்த விடயம் அம்பலமாகியுள்ளது. நீதிமன்ற விசாரணைகளைத் தொடர்ந்து, அவரை ஏப்ரல் 2 ஆம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார். இலஞ்ச ஊழல் ஒழிப்பு ஆணைக்குழுவில் வாக்குமூலம் அளிக்கச் சென்ற போது, கடந்த மார்ச் 12 ஆம் திகதி இவர் கைது செய்யப்பட்டார் என்பது குறிப்பிடத்தக்கது.
மோசடியின் பின்னணி: கடந்த 2012-2013 காலப்பகுதியில் ஸ்ரீலங்கன் ஏர்லைன்ஸ் நிறுவனத்தில் இருந்த 13 பழைய விமானங்களை அகற்றிவிட்டு, புதிதாக 14 விமானங்களை இணைக்க முன்மொழிவு செய்யப்பட்டது. இதற்காக பிரான்சின் எயார்பஸ் நிறுவனத்திடம் இருந்து 6 A330 மற்றும் 4 A350 ரக விமானங்களைக் கொள்வனவு செய்வதற்கான ஒப்பந்தம் கையெழுத்தானது. குற்றப்புலனாய்வுத் திணைக்களத்தின் (CID) ஒருங்கிணைப்புடன் இந்த விசாரணை நடைபெற்று வருகிறது.
இந்த பாரிய மோசடி குறித்த தகவல்கள் 2020 ஜனவரியில் இங்கிலாந்தின் தீவிர மோசடி தடுப்பு அலுவலகத்தின் (SFO) விசாரணைகள் மூலம் வெளிச்சத்திற்கு வந்தன. 10 விமானங்களைக் கொள்வனவு செய்யும் இந்த ஒப்பந்தத்திற்காக 16.84 மில்லியன் அமெரிக்க டொலர்களை லஞ்சமாக வழங்க எயார்பஸ் நிறுவனம் உறுதியளித்திருந்தமை அம்பலமானது.
பணப்பரிமாற்றம் நடந்தது எப்படி? இங்கிலாந்து SFO அமைப்பின் விசாரணைகளின்படி, லஞ்சப் பணத்தில் 2 மில்லியன் டொலர்கள் கபில சந்திரசேனவின் மனைவியின் பெயரில் உள்ள நிறுவனத்தின் ஊடாக புருனேயில் உள்ள கணக்கில் வைப்பிலிடப்பட்டுள்ளது. பின்னர் அங்கிருந்து சிங்கப்பூர் மற்றும் அவுஸ்திரேலியாவில் உள்ள கபில சந்திரசேனவின் சொந்தக் கணக்குகளுக்கும், அதைத் தொடர்ந்து இலங்கையில் உள்ள இரண்டு வங்கி கணக்குகளுக்கும் பல தடவைகளில் பணம் மாற்றப்பட்டுள்ளது.
மூன்றாவது சந்தேக நபர் ஷமீந்திர ராஜபக்ஷ: இதற்கிடையில், முன்னாள் சபாநாயகர் சமல் ராஜபக்ஷவின் மகனான ஷமீந்திர ராஜபக்ஷ இந்த வழக்கில் மூன்றாவது சந்தேக நபராகப் பெயரிடப்பட்டுள்ளார். 2013 ஆம் ஆண்டில் அவரது வங்கிக் கணக்கில் 160,000 அமெரிக்க டொலர்கள் வைப்பிலிடப்பட்டமை விசாரணைகளில் அம்பலமானதையடுத்து இந்த நடவடிக்கை எடுக்கப்பட்டுள்ளது.
