உலகையே அச்சுறுத்தி வந்த மேற்காசிய போர் மேகங்கள் ஒருவழியாக விலகத் தொடங்கியுள்ளன. பல ஆண்டுகளாக நீடித்து வந்த அமெரிக்கா மற்றும் ஈரானுக்கு இடையிலான பகைமையை மறந்து, இரு நாடுகளும் ஒரு “தற்காலிக அமைதி ஒப்பந்தத்தில்” கையெழுத்திடச் சம்மதித்துள்ளன என்ற பிரத்தியேகத் தகவல் கிடைத்துள்ளது. அடுத்த 24 மணி நேரத்திற்குள், அமெரிக்க அதிபர் டொனால்ட் டிரம்ப் மற்றும் ஈரானின் உச்ச தலைவர் மொஜ்தபா கமேனி ஆகியோர் ஒரே நேரத்தில் இந்த அறிவிப்பை அதிகாரப்பூர்வமாக வெளியிடுவார்கள் என்று எதிர்பார்க்கப்படுகிறது.
கடந்த சில வாரங்களாகவே இரு நாடுகளுக்கும் இடையே போர் மூளும் அபாயம் மிக அதிகமாக இருந்தது. ஒட்டுமொத்த பிராந்தியமும் எப்போது வேண்டுமானாலும் போர்க்களமாக மாறலாம் என்ற அச்சம் உலக நாடுகளில் நிலவியது. இந்தச் சூழலில், பாகிஸ்தான் மற்றும் கத்தார் நாட்டுத் தூதரக அதிகாரிகள் மிகத் தீவிரமாகச் செயல்பட்டு, இரு நாடுகளுக்கும் இடையே சமாதான தூதுவர்களாக இருந்து பேச்சுவார்த்தைகளை நடத்தினர். வார இறுதியில் ஈரானின் தலைநகரான தெஹ்ரானில் நடந்த மிக முக்கியமான கூட்டத்தில், இந்த அமைதி ஒப்பந்தத்திற்கான வரைவு அறிக்கை இறுதி செய்யப்பட்டது.
அமைதியின் பின்னணியில் உழைத்த முக்கிய நபர்கள்:
அமெரிக்கா மற்றும் ஈரான் ஆகிய இரு தரப்பிலும் உள்ள மிக முக்கியப் பொறுப்பாளர்கள் இந்த ஒப்பந்தத்தை உறுதி செய்துள்ளனர். ஈரான் தரப்பில், அந்நாட்டின் நாடளுமன்ற சபாநாயகர் முகமது பாகர் காலிபாஃப் இந்த ஒப்பந்தத்தின் சட்ட ரீதியான அம்சங்களை இறுதி செய்தார். அமெரிக்கத் தரப்பில், அதிபர் டிரம்பிற்கு மிகவும் நெருக்கமானவர்கள் களம் இறக்கப்பட்டனர். அமெரிக்கத் துணை அதிபர் ஜே.டி.வென்ஸ், வெள்ளை மாளிகையின் சிறப்புத் தூதர் ஸ்டீவ் விட்காஃப் மற்றும் சிறப்புப் பிரதிநிதி ஜாரெட் குஷ்னர் ஆகியோர் ஈரானுடன் தொடர்ந்து பேச்சுவார்த்தை நடத்தி, இரு நாடுகளும் ஏற்றுக்கொள்ளக்கூடிய ஒரு பொதுவான முடிவுக்கு வழிவகுத்தனர். இந்தியாவில் இருக்கும் அமெரிக்க வெளியுறவுத் துறை அமைச்சர் மார்கோ ரூபியோவும், “நல்ல செய்தி வரலாம்” என்று மறைமுகமாக இதை உறுதிப்படுத்தியுள்ளார்.
ஒப்பந்தத்தின் முக்கிய அம்சங்கள்:
இப்போது கையெழுத்தாகப் போகும் ஒப்பந்தம் நிரந்தரமானது அல்ல. இது ஒரு தற்காலிக “நோக்கக் கடிதம்” (Letter of intent) ஆகும். அதாவது, உடனடியாகப் போரை நிறுத்திவிட்டு, அமைதியாகப் பேசுவதற்கான ஒரு தற்காலிக ஏற்பாடுதான் இது.
ஒப்பந்தத்தின்படி அடுத்த 30 முதல் 60 நாட்களுக்கு:
- போர் நிறுத்தம்: இரு நாடுகளும் எந்தவித மோதலிலும் ஈடுபடக் கூடாது.
- ஹார்முஸ் நீரிணை திறப்பு: உலக வர்த்தகத்திற்கு மிக முக்கியப் பாதையான “ஹார்முஸ் நீரிணை” (Strait of Hormuz) பகுதியை பன்னாட்டு வணிகக் கப்பல்களின் போக்குவரத்திற்காக ஈரான் திறந்து வைக்க வேண்டும். எந்தவிதக் கட்டணமோ அல்லது தடைகளோ விதிக்கக்கூடாது.
- முடக்கப்பட்ட சொத்துக்கள்: இதற்குப் பிரதிபலனாக, அமெரிக்காவால் முடக்கப்பட்டுள்ள ஈரானின் சில வங்கிச் சொத்துக்களைப் பயன்படுத்துவதற்கு அமெரிக்கா தற்காலிக அனுமதி வழங்கும்.
இந்த 30 முதல் 60 நாட்களுக்குள், இரு நாடுகளின் அதிகாரிகளும் அமர்ந்து மிகவும் சிக்கலான பிரச்சனைகளான ஈரானின் செறிவூட்டப்பட்ட யுரேனியம் இருப்பு மற்றும் பிராந்தியப் பாதுகாப்பு குறித்த நிரந்தர முடிவுகளைப் பேசித் தீர்ப்பார்கள்.
இரு தரப்பிலும் இருக்கும் தீவிரப் போக்காளர்கள் கடைசி நேரத்தில் ஏதேனும் முட்டுக்கட்டைப் போடாத வரை, அடுத்த 24 மணி நேரத்தில் வெளியாகப்போகும் இந்த அறிவிப்பு, பல மாதங்களாக நீடித்து வந்த மேற்காசியப் போருக்கு ஒரு முற்றுப்புள்ளி வைக்கும் என்று உலகம் ஆவலோடு எதிர்பார்த்துக் கொண்டிருக்கிறது.
