சுற்றுலாத்துறை நிதி முறைகேடு விவகாரம்: பஸில் ராஜபக்ஷ உள்ளிட்டோரை கைது செய்ய சிஐடிக்கு நீதிமன்றம் அதிரடி உத்தரவு!

அரசு நிதியை முறைகேடாகப் பயன்படுத்தியதாகத் தாக்கல் செய்யப்பட்ட வழக்கு தொடர்பாக, முன்னாள் அமைச்சர் பஸில் ராஜபக்ஷ உள்ளிட்ட பலரைக் கைது செய்து நீதிமன்றத்தில் ஆஜர்படுத்துமாறு குற்றப் புலனாய்வுத் திணைக்களத்திற்கு (CID) கொழும்பு கோட்டை நீதவான் நீதிமன்றம் இன்று உத்தரவிட்டுள்ளது.

2014 ஆம் ஆண்டு ஊவா மாகாண சபைத் தேர்தலின் போது, ஸ்ரீலங்கா சுற்றுலா ஊக்குவிப்பு பணியகத்திற்குச் (SLTPB) சொந்தமான 7.8 மில்லியன் ரூபாய் நிதியைத் தேர்தல் பிரச்சார நடவடிக்கைகளுக்காக முறைகேடாகப் பயன்படுத்தியதாக சுமத்தப்பட்டுள்ள குற்றச்சாட்டு தொடர்பிலேயே நீதவான் பாசன் அமரசேன இந்த உத்தரவைப் பிறப்பித்துள்ளார்.

இதனடிப்படையில், முன்னாள் அமைச்சர் பஸில் ராஜபக்ஷ, ஸ்ரீலங்கா சுற்றுலா ஊக்குவிப்பு பணியகத்தின் முன்னாள் தலைவர் பாஸ்வர குணரத்ன மற்றும் அதன் முன்னாள் அத்தியட்சகர் ரூமி ஜௌபர் உள்ளிட்டோரை உடனடியாகக் கைது செய்து நீதிமன்றத்தில் ஆஜர்படுத்துமாறு சிஐடிக்கு உத்தரவிடப்பட்டுள்ளது.

சட்டமா அதிபரின் ஆலோசனையின் பேரில், பொதுச் சொத்துச் சட்டத்தின் கீழ் இந்த நபர்கள் சந்தேகநபர்களாகப் பெயரிடப்பட்டுள்ளதாகக் குற்றப் புலனாய்வுத் திணைக்களத்தினர் இன்று (29) நீதிமன்றத்திற்குத் தாக்கல் செய்த மோஷன் மூலம் அறிவித்ததை அடுத்து நீதவான் இந்த உத்தரவைப் பிறப்பித்துள்ளார்.

சந்தேகநபர்களைக் கைது செய்வதற்காக அதிகாரிகள் அவர்களின் குடியிருப்பு முகவரிகளுக்குச் சென்ற போதிலும், அவர்கள் அந்த இடங்களில் இருக்கவில்லை எனக் குற்றப் புலனாய்வுத் திணைக்களம் நீதிமன்றத்தில் சுட்டிக்காட்டியுள்ளது.

இதனைத் தொடர்ந்து, சந்தேகநபர்களுக்கு வெளிநாடு செல்ல தடை விதிக்குமாறு விடுக்கப்பட்ட கோரிக்கையை பரிசீலித்த நீதவான், அவர்களுக்கு வெளிநாட்டுப் பயணத் தடையை விதித்ததுடன், இது குறித்து குடிவரவு மற்றும் குடியகல்வு கட்டுப்பாட்டாளர் நாயகத்திற்கு அறிவிக்குமாறும் உத்தரவிட்டார்.

டி-சர்ட் அச்சிடப்பட்ட விவகாரம்:

கடந்த 2014 ஆம் ஆண்டில், சுற்றுலா ஊக்குவிப்பை மேற்கொள்வதாகக் கூறி, சுற்றுலா ஊக்குவிப்பு பணியகத்தின் நிதியைப் பயன்படுத்தி, ஒரு பக்கத்தில் முன்னாள் ஜனாதிபதி மஹிந்த ராஜபக்ஷவின் புகைப்படமும், மறுபக்கத்தில் அரசியல் கட்சி ஒன்றின் பெயரும் அச்சிடப்பட்ட 12,000 டி-சர்ட்டுகள் (T-shirts) அச்சிடப்பட்டுள்ளதாக சிஐடியினர் நீதிமன்றத்தில் தெரிவித்துள்ளனர்.

இந்த டி-சர்ட்டுகள் அனைத்தும் மொனராகலை மாவட்டத்தில் நடைபெற்ற அரசியல் நிகழ்ச்சி ஒன்றிற்காக விநியோகிக்கப்பட்டுள்ளதாகப் பொலிஸார் மேலும் நீதிமன்றத்தில் சுட்டிக்காட்டியுள்ளனர்.