“அரசியலமைப்புச் சர்வாதிகாரத்திற்கு எதிராக 1000 போராட்டங்களை நடத்துவோம்”: ரணில் அறைகூவல்!

கொழும்பு: “நாட்டின் தற்போதைய அரசாங்கம், அரசியலமைப்புச் சர்வாதிகாரத்தை நிறுவ முயற்சிக்கிறது. அதற்கு எதிராக, ஒன்றிணைந்து 1000 பேரணிகள், சத்தியாக்கிரகங்கள் மற்றும் போராட்டங்களை நடத்துவோம்,” என முன்னாள் ஜனாதிபதி ரணில் விக்ரமசிங்க அறைகூவல் விடுத்துள்ளார். நேற்று (20) நடைபெற்ற ஐக்கிய தேசியக் கட்சியின் (ஐ.தே.க.) வருடாந்த மாநாட்டில் உரையாற்றுகையிலேயே அவர் இதனைக் கூறினார். தனது சமீபத்திய கைது குறித்துப் பேசிய அவர், “நான் பல நாடுகளுக்கு உத்தியோகப்பூர்வ விஜயம் மேற்கொண்டதற்காகவே கைது செய்யப்பட்டேன். ஹவானாவில் G77 மாநாடு, அமெரிக்காவில் ஐ.நா. கூட்டங்கள், உலக வங்கி மற்றும் சர்வதேச நாணய நிதியத் தலைவர்களுடன் சந்திப்பு என அனைத்தும் உத்தியோகப்பூர்வமானவை. இங்கிலாந்து நிறுத்தம் ஒரு இடைநிறுத்தம் மட்டுமே. இந்தப் பயணத்திற்கு நான் அரச நிதியைப் பயன்படுத்தவில்லை,” எனத் திட்டவட்டமாகத் தெரிவித்தார். இந்த மாநாடு, ஒன்றிணைந்த போராட்டத்தின் ஆரம்பம் எனக் குறிப்பிட்ட அவர், அனைத்து எதிர்க்கட்சிகளும் கைகோர்க்க வேண்டும் எனவும் அழைப்பு விடுத்தார்.