பங்களாதேஷ் அணிக்கு எதிரான போட்டியில் 114 ஓட்டங்கள் வித்தியாசத்தில் அபார வெற்றி பெற்ற இந்திய மகளிர் அணி, ஆசிய விளையாட்டுப் போட்டிகளின் இறுதிப்போட்டிக்குத் தகுதி பெற்றுள்ளது.
எதிர்வரும் இறுதிப்போட்டியில் இந்திய அணி இலங்கையை எதிர்கொள்ளவுள்ளது. முன்னதாக நடைபெற்ற அரையிறுதிப் போட்டியில் பாகிஸ்தான் அணியை வீழ்த்தி இலங்கை அணி இறுதிப்போட்டிக்கு முன்னேறியிருந்தமை குறிப்பிடத்தக்கது. 2026 ஆம் ஆண்டுக்கான ஆசிய விளையாட்டுப் போட்டிகள் ஜப்பானில் நடைபெற்று வருகின்றன.
இப்போட்டியில் முதலில் துடுப்பெடுத்தாடிய இந்திய அணி, நிர்ணயிக்கப்பட்ட 20 ஓவர்கள் முடிவில் 4 விக்கெட்டுகளை இழந்து 195 ஓட்டங்களைக் குவித்தது. இந்திய அணியின் துடுப்பாட்டத்தில் அதிரடி காட்டிய ஷபாலி வர்மா (Shafali Verma) 49 பந்துகளில் ஆட்டமிழக்காமல் 100 ஓட்டங்களைப் பெற்று சதமடித்தார்.
196 ஓட்டங்கள் என்ற வெற்றி இலக்கை நோக்கிப் பதிலுக்குத் துடுப்பெடுத்தாடிய பங்களாதேஷ் அணி, 15.4 ஓவர்களில் அனைத்து விக்கெட்டுகளையும் இழந்து 81 ஓட்டங்களை மாத்திரமே பெற்றுத் தோல்வியடைந்தது. பந்துவீச்சில் இந்திய அணியின் நந்தனி சர்மா மற்றும் தீப்தி சர்மா ஆகியோர் தலா 3 விக்கெட்டுகளைக் கைப்பற்றினர்.
எதிர்வரும் செப்டெம்பர் 22 ஆம் திகதி நடைபெறும் வெண்கலப் பதக்கத்துக்கான போட்டியில் பாகிஸ்தான் மற்றும் பங்களாதேஷ் அணிகள் மோதவுள்ளன. அதே தினத்தில் நடைபெறும் தங்கப் பதக்கத்துக்கான இறுதிப்போட்டியில் இலங்கை மற்றும் இந்திய அணிகள் பலப்பரீட்சை நடத்தவுள்ளன.
