செயற்கை நுண்ணறிவு (AI) துறையின் சிம்மாசனத்தை அலங்கரிக்கப் போவது யார்? மனிதகுலத்தின் நன்மையா அல்லது பில்லியன் டாலர் லாபமா? இந்த பிரம்மாண்ட கேள்விகளுக்கான பதிலை அமெரிக்காவின் ஓக்லாந்தில் உள்ள மத்திய நடுவர் மன்றம் இன்று முதல் தீர்மானிக்கவுள்ளது. டெக் உலகத்தையே உலுக்கி வரும் எலான் மஸ்க் மற்றும் சாம் ஆல்ட்மேன் இடையேயான சட்டப் போராட்டம், இன்று (ஏப்ரல் 28, 2026) முதல் நான்கு வாரங்களுக்கு நேருக்கு நேர் விசாரணைக்கு வருகிறது.
துரோகமும் பில்லியன் டாலர் இழப்பீடும்: மஸ்க்கின் குற்றச்சாட்டு
உலகப் பெரும் கோடீஸ்வரரான எலான் மஸ்க், ‘சாட் ஜிபிடி’ (ChatGPT) மூலம் உலகப் புகழ்பெற்ற OpenAI நிறுவனத்தின் இணை நிறுவனர் என்பது பலரும் அறிந்ததே. கடந்த 2015-ல் மஸ்க் மற்றும் சாம் ஆல்ட்மேன் இணைந்து கூகுள் போன்ற பெரும் நிறுவனங்களின் ஏகபோக ஆதிக்கத்தைத் தடுத்து, மனிதகுலத்தின் நன்மைக்காக ஒரு லாப நோக்கற்ற (Non-profit) அமைப்பாகப் பாதுகாப்பான ஏஐ-யை உருவாக்கும் உன்னத நோக்கத்துடன் OpenAI-யைத் தொடங்கினர்.
ஆனால், மஸ்க் 2018-ல் வெளியேறிய பிறகு, நிறுவனத்தின் தலைமைச் செயல் அதிகாரியான சாம் ஆல்ட்மேன் மற்றும் தலைவர் கிரெக் ப்ராக்மேன் ஆகியோர் நிறுவனத்தின் ஸ்தாபக நோக்கத்திலிருந்து முழுமையாக விலகிவிட்டதாக மஸ்க் குற்றம் சாட்டுகிறார். லாப நோக்கற்ற ஒரு நிறுவனமாகத் தொடர்ந்து பராமரிப்பதாகத் தனக்கு அளித்த வாக்குறுதியை மீறி, ஆல்ட்மேன் மற்றும் ப்ராக்மேன் ஆகியோர் தன்னை ஏமாற்றி நிதி பெற வைத்ததாகவும், பின்னர் OpenAI-ஐ ஒரு லாப நோக்குடைய துணை நிறுவனமாக (For-profit entity) மறுசீரமைத்ததாகவும் மஸ்க் உரிமையியல் வழக்குத் தொடுத்துள்ளார்.
இந்த மாபெரும் ‘துரோகத்திற்காக’ சுமார் 130 பில்லியன் டாலர் வரை நஷ்டஈடு கேட்டு ஆலட்மேனுக்கு எதிராக மஸ்க் போர்க்கொடி தூக்கியுள்ளார்.
மஸ்க்கின் கோரிக்கையும், OpenAI-இன் பதிலடியும்
OpenAI நிறுவனம் மீண்டும் ஒரு லாப நோக்கற்ற அமைப்பாக மாற வேண்டும் என்றும், ஆல்ட்மேன் மற்றும் ப்ராக்மேன் ஆகியோர் தற்போதைய பதவிகளிலிருந்தும், இயக்குநர் குழுவிலிருந்தும் நீக்கப்பட வேண்டும் என்றும் எலான் மஸ்க் உறுதியாகக் கோருகிறார்.
மறுபுறம், OpenAI நிறுவனம் இந்த குற்றச்சாட்டுகளைத் தீர்க்கமாக நிராகரித்துள்ளது. மஸ்க்கின் குற்றச்சாட்டுகள் ஆதாரமற்றவை என்றும், அவை வெறும் பொறாமையின் வெளிப்பாடு என்றும் அந்நிறுவனம் கூறியுள்ளது. OpenAI-இன் விரைவான வளர்ச்சியைக் கண்டு அஞ்சும் மஸ்க், அதைக் குலைக்கவும், 2023-ல் போட்டியாளராகத் தான் அறிமுகப்படுத்திய தனது சொந்த xAI-ஐ வலுப்படுத்தவும் இந்த வழக்கை ஒரு தந்திரமாகப் பயன்படுத்துகிறார் என OpenAI குற்றம் சாட்டியுள்ளது.
சாட்சியமளிக்கப் போகும் டெக் உலக ஜாம்பவான்கள்
இந்த வழக்கின் முக்கியத்துவத்தைக் கருத்தில் கொண்டு, டெக் உலகமே வியக்கும் சாட்சிகள் விசாரிக்கப்பட உள்ளனர். கலிபோர்னியாவின் ஓக்லாந்தில் உள்ள அமெரிக்க மாவட்ட நீதிபதி இவோன் கொன்சாலஸ் ரோஜர்ஸ் மற்றும் 9 நடுவர்கள் முன்னிலையில் இந்த விசாரணை நடைபெறும். நடுவர்கள் வழங்கும் ஆலோசனைத் தீர்ப்பு கட்டாயமானதல்ல என்றாலும், அது நீதிபதிக்கு முக்கிய வழிகாட்டியாக இருக்கும்.
எலான் மஸ்க், சாம் ஆல்ட்மேன் மற்றும் கிரெக் ப்ராக்மேன் ஆகியோர் நேரடியாகச் சாட்சியமளிப்பார்கள். இவர்களுடன், OpenAI-இன் முன்னாள் தலைமை விஞ்ஞானி இல்யா சுட்ஸ்கேவர், முன்னாள் தலைமை தொழில்நுட்ப அதிகாரி மீரா முராட்டி மற்றும் மைக்ரோசாப்ட் தலைமை நிர்வாக அதிகாரி சத்யா நாதெல்லா ஆகியோரும் சாட்சியமளிப்பார்கள் என எதிர்பார்க்கப்படுவது வழக்கின் விறுவிறுப்பை அதிகரித்துள்ளது.
ஏஐ துறையின் எதிர்காலத்தைத் தீர்மானிக்கும் தீர்ப்பு?
850 பில்லியன் டாலருக்கும் அதிகமான மதிப்புள்ள OpenAI நிறுவனத்திற்கு, இந்த வழக்கு பெரும் அபாயமாக மாறியுள்ளது. மஸ்க் வெற்றி பெற்றால், அது இந்த ஆண்டின் இறுதியில் பொதுப் பங்கு வெளியீட்டிற்கு (IPO) விரைந்து கொண்டிருக்கும் OpenAI-ஐ முடக்கிவிடக்கூடும். மாறாக, மஸ்க்கின் xAI நிறுவனம் (SpaceX-ன் ஒரு பகுதியாக) ஜூன் மாதம் IPO-விற்கு வரவுள்ள நிலையில், மஸ்க் வெற்றி பெற்றால், ஸ்பேஸ் எக்ஸுடன் இணைந்து 1.25 டிரில்லியன் டாலர் மதிப்புள்ள xAI, செயற்கை நுண்ணறிவு துறையில் ஒரு மாபெரும் எழுச்சியைக் காணக்கூடும்.
இந்த வழக்கின் முடிவு சிலிக்கான் வேலியில் ஏஐ-யின் எதிர்காலத்தைத் தலைகீழாக மாற்றக்கூடும். மனிதகுலத்திற்கான தன்னலமற்ற சேவையா அல்லது வணிக ரீதியான வெற்றியைக் கொண்ட முதலாளித்துவமா? நடுவர் மன்றத்தின் தீர்ப்புக்காக உலகம் மூச்சுப்பிடித்துக் காத்திருக்கிறது.
