உயர்கல்வி மற்றும் முன்பள்ளிக் கல்வியில் பாரிய சீர்திருத்தங்கள்: நாடாளுமன்றத்தில் பிரதமர் ஹரிணி அமரசூரிய அறிவிப்பு

ஆரம்ப மற்றும் இடைநிலைக் கல்வித் துறைகளில் நடைமுறைப்படுத்தப்படும் புதிய சீர்திருத்தங்களுக்கு அமைவாக, உயர்கல்வித் துறையிலும் உரிய மாற்றங்களை அறிமுகப்படுத்த அரசாங்கம் திட்டமிட்டுள்ளதாக பிரதமர் கலாநிதி ஹரிணி அமரசூரிய தெரிவித்துள்ளார்.

நாடாளுமன்ற உறுப்பினர் மஞ்சுள சுதத் ரத்நாயக்க எழுப்பிய கேள்விகளுக்குப் பதிலளிக்கையிலேயே பிரதமர் இதனைக் குறிப்பிட்டார்.

உயர்கல்விச் சீர்திருத்தங்கள் மற்றும் பல்கலைக்கழக அனுமதி

இதற்காக நியமிக்கப்பட்ட விசேட நிபுணர் குழு கடந்த 6 மாதங்களாக இயங்கி வருவதாகவும், அதன் அறிக்கையின் அடிப்படையில் உயர்கல்வித் துறையில் உள்ள பிரச்சினைகள் கண்டறியப்பட்டு தேவையான சீர்திருத்தங்கள் மேற்கொள்ளப்படும் எனவும் பிரதமர் தெரிவித்தார்.

2025 ஆம் ஆண்டு க.பொ.த உயர்தரப் பரீட்சைக்குத் தோற்றிய 281,810 மாணவர்களில் 176,538 பேர் பல்கலைக்கழக அனுமதிக்கான தகுதியைப் பெற்றுள்ளனர். துறைவாரியாகத் தகுதி பெற்ற மாணவர்களின் விவரம்:

• உயிரியல் விஞ்ஞானம்: 32,935
• பௌதிக விஞ்ஞானம்: 23,012
• வர்த்தகம்: 39,608
• கலை: 58,269
• பொது: 4,199
• பொறியியல் தொழில்நுட்பம்: 12,472
• உயிரியல் முறைமைகள் தொழில்நுட்பம்: 6,043

இவர்களில் 42,937 பேர் பல்கலைக்கழகங்களுக்கு அனுமதிக்கப்படவுள்ளனர். கல்வியின் தரத்தை உறுதி செய்யும் அதேவேளை, மாணவர்களுக்கான வசதிகளை மேம்படுத்துவதற்கு அரசாங்கம் முன்னுரிமை அளிக்கிறது. அத்துடன், முதலாம் பட்டப்படிப்புக்கான மாணவர் உள்ளீர்ப்பை கடந்த ஆண்டுகளைப் போலவே பேணுவதற்கும் தீர்மானிக்கப்பட்டுள்ளது.

புதிய பாடநெறிகள் அறிமுகம்

2025/2026 கல்வியாண்டில் ருஹுணு பல்கலைக்கழகத்தில் ‘புவியியல் தகவல் அமைப்புகள்’ (Geographic Information Systems) மற்றும் பேராதனைப் பல்கலைக்கழகத்தில் ‘இலத்திரனியல் மற்றும் நுண்ணறிவு அமைப்புகள் பொறியியல்’ ஆகிய புதிய பாடநெறிகள் அறிமுகப்படுத்தப்பட்டுள்ளன. ஒவ்வொன்றிற்கும் தலா 50 மாணவர்கள் இணைக்கப்படவுள்ளனர். இதற்கான வெட்டுப்புள்ளிகள் வெளியிடப்பட்டு, பதிவுப் பட்டியல்கள் உரிய பல்கலைக்கழகங்களுக்கு அனுப்பி வைக்கப்பட்டுள்ளன.

முன்பள்ளிக் கல்வி மற்றும் தொண்டர் ஆசிரியர்கள் தொடர்பான கொள்கை

நாடாளுமன்ற உறுப்பினர் கே. காதர் மஸ்தான் எழுப்பிய முன்பள்ளிக் கல்வி தொடர்பான கேள்விக்குப் பதிலளித்த பிரதமர், நாட்டின் பெரும்பாலான முன்பள்ளிகள் தனியாரால் நிர்வகிக்கப்படுவதால், தற்போதைக்கு அவர்களது ஊழியர்களுக்கு நிரந்தர நியமனங்களையோ சம்பளத்தையோ வழங்குவதற்கான ஏற்பாடுகள் அமைச்சிடம் இல்லை என்றார். எனினும், மாகாண சபைகளின் கீழ் தெரிவு செய்யப்பட்ட முன்பள்ளிகளில் உள்ள தொண்டர் ஆசிரியர்களுக்கு குறிப்பிட்ட கொடுப்பனவை வழங்குவதற்கான நடவடிக்கைகள் எடுக்கப்பட்டு வருகின்றன.

2027 ஆம் ஆண்டளவில் முன்பள்ளிக் கல்வி முறைமை முழுமையாக சீர்திருத்தப்படும் என எதிர்பார்க்கப்படுவதுடன், கல்வி அமைச்சு மற்றும் மகளிர் மற்றும் சிறுவர் விவகார அமைச்சு இணைந்து இதற்கான நடவடிக்கைகளை மேற்கொள்ளவுள்ளன. அத்துடன், தேசிய கல்வி ஆணைக்குழுவின் பரிந்துரைகளின் அடிப்படையில், 2026 ஆம் ஆண்டில் முன்பள்ளிக் கல்வியை ஒழுங்குபடுத்துவதற்கான தேசியக் கொள்கையொன்று ஸ்தாபிக்கப்படவுள்ளது. இதன் கீழ் ஆசிரியர் வழிகாட்டல்கள் மற்றும் மாதிரிச் செயற்பாட்டுக் கையேடுகள் தயாரிக்கப்பட்டு வருவதுடன், மாகாண மட்டத்தில் ஆசிரியர் பயிற்சி வேலைத்திட்டங்களை முன்னெடுக்கவும் திட்டமிடப்பட்டுள்ளது.

மேலும், 2007 ஜனவரி 4 ஆம் திகதியிட்ட அமைச்சரவைத் தீர்மானத்திற்கு அமைவாக, அங்கீகரிக்கப்பட்ட 4,700 ஆசிரியர் உதவியாளர்களைத் தவிர வேறு எந்தவொரு தொண்டர் ஆசிரியர்களையும் புதிதாக இணைத்துக்கொள்வதில்லை என்ற கொள்கை தொடர்ந்து நடைமுறைப்படுத்தப்படும் எனவும் பிரதமர் வலியுறுத்தினார்.