2019 ஈஸ்டர் ஞாயிறு பயங்கரவாதத் தாக்குதலில் பாதிக்கப்பட்டவர்களுக்கு உண்மை மற்றும் நீதியைப் பெற்றுக்கொடுப்பதற்காக கொழும்பு பேராயர் கர்தினால் மல்கம் ரஞ்சித் மற்றும் கத்தோலிக்க திருச்சபை முன்னெடுத்து வரும் முயற்சிகளுக்கு இலங்கை கத்தோலிக்க ஆயர் பேரவை தனது முழுமையான ஆதரவை வெளிப்படுத்தியுள்ளது.
இது தொடர்பாக ஆயர் பேரவை வெளியிட்டுள்ள அறிக்கையில், கர்தினால் மற்றும் சில மதகுருமார்களுக்கு எதிராக சமூக வலைதளங்களில் அண்மைக்காலமாகப் பரப்பப்படும் பொய்யான மற்றும் அவதூறான கருத்துக்களை வன்மையாகக் கண்டித்துள்ளது. ஈஸ்டர் தாக்குதல் தொடர்பான உண்மைகளைச் சிதைக்க சில குழுக்கள் முயற்சிப்பதாக பேரவை சுட்டிக்காட்டியுள்ளது.
கர்தினால் ரஞ்சித் ஈஸ்டர் தாக்குதலைத் தனது பதவிக்காலத்தை நீட்டிக்கப் பயன்படுத்துகிறார் என்ற குற்றச்சாட்டை ஆயர் பேரவை நிராகரித்துள்ளது. இவ்வாறான பிரசாரங்கள் தவறானவை மற்றும் ஏற்றுக்கொள்ள முடியாதவை என்று கூறியுள்ள பேரவை, திருச்சபை சட்டங்கள் (Canon law) தொடர்பில் தவறான தகவல்களைப் பரப்பி பொதுமக்களைக் குழப்பும் முயற்சிகள் வருத்தமளிப்பதாகத் தெரிவித்துள்ளது.
திருச்சபை சட்டத்தின்படி (Canon 401), ஆயர்கள் 75 வயதை அடையும்போது திருத்தந்தையிடம் தங்களது இராஜினாமா கடிதத்தைச் சமர்ப்பிக்க வேண்டும். இருப்பினும், அந்த இராஜினாமாவை ஏற்றுக்கொள்வதும், சேவையை நீட்டிப்பது தொடர்பான முடிவை எடுப்பதும் திருத்தந்தையின் அதிகாரத்திற்கு உட்பட்டது. இதற்கமைய, கர்தினால் ரஞ்சித் தனது 75 ஆவது வயதில் இராஜினாமா கடிதத்தைச் சமர்ப்பித்ததுடன், வத்திக்கானின் முடிவு வரும்வரை தனது பணிகளைத் தொடர்ந்து ஆற்றி வருகிறார் என்று பேரவை விளக்கம் அளித்துள்ளது.
கர்தினால் ரஞ்சித் உள்ளூர் மற்றும் உலகளாவிய திருச்சபைக்கு ஆற்றி வரும் சேவையைப் பாராட்டிய ஆயர் பேரவை, அவர் ஈஸ்டர் தாக்குதலில் பாதிக்கப்பட்டவர்களுக்காக மிகுந்த நேர்மையுடனும் அர்ப்பணிப்புடனும் தொடர்ந்து குரல் கொடுத்து வருவதாகக் குறிப்பிட்டுள்ளது. இலங்கை கத்தோலிக்க சமூகம் மற்றும் ஆயர் பேரவையின் அசைக்க முடியாத ஆதரவு கர்தினாலுக்கு எப்போதும் உண்டு என்றும் அந்த அறிக்கையில் தெரிவிக்கப்பட்டுள்ளது.
இலங்கை கத்தோலிக்க ஆயர் பேரவையின் தலைவர் பேராயர் ஹரால்ட் அந்தோணி பெரேரா மற்றும் செயலாளர் நாயகம் ஆண்டன் ரஞ்சித் (மட்டக்களப்பு திருத்தூதுப் பரிபாலகர் மற்றும் கொழும்பு உதவி ஆயர்) ஆகியோரின் கையொப்பங்களுடன் இந்த அறிக்கை வெளியிடப்பட்டுள்ளது.
