அமெரிக்க அதிபர் டொனால்ட் ட்ரம்ப்பை படுகொலை செய்ய முயன்றதாக கலிபோர்னியா மாநிலத்தைச் சேர்ந்த நபர் ஒருவர் மீது குற்றம் சாட்டப்பட்டுள்ளது. இந்தச் சம்பவத்தைத் தொடர்ந்து வெள்ளை மாளிகையின் பாதுகாப்பு ஏற்பாடுகள் குறித்து மறுஆய்வு செய்ய உத்தரவிடப்பட்டுள்ளது.
31 வயதுடைய கோல் டோமாஸ் ஆலன் (Cole Tomas Allen), வாஷிங்டன் டிசியில் உள்ள நீதிமன்றத்தில் திங்கட்கிழமை முன்னிலைப்படுத்தப்பட்டார். அவர் மீது துப்பாக்கி தொடர்பான இரண்டு குற்றச்சாட்டுகளும் சுமத்தப்பட்டுள்ளன. எனினும், அவர் இந்த வழக்கில் தனது தரப்பு பதிலை (Plea) சமர்ப்பிக்கவில்லை.
கடந்த சனிக்கிழமை நடைபெற்ற வெள்ளை மாளிகை செய்தியாளர்கள் சங்கத்தின் இரவு விருந்தின் போது, பாதுகாப்பு சோதனைச் சாவடியைக் கடந்து அவர் வேகமாகச் சென்றதாக அரசுத் தரப்பு வழக்கறிஞர்கள் தெரிவித்தனர். அப்போது அவர் அரையாட்டோமேட்டிக் கைத்துப்பாக்கி (semi-automatic handgun), பம்ப்-ஆக்சன் ஷாட்கன் (pump-action shotgun) மற்றும் மூன்று கத்திகளை வைத்திருந்தார்.
ஒரு ஹோட்டலில் நடந்த இந்தத் தாக்குதலின் போது, அமெரிக்க இரகசிய சேவை (Secret Service) அதிகாரி ஒருவர் தாக்கப்பட்டார், ஆனால் அவர் பலத்த காயமடையவில்லை. குற்றம் நிரூபிக்கப்பட்டால், குற்றம் சாட்டப்பட்டவருக்கு ஆயுள் தண்டனை விதிக்கப்பட வாய்ப்புள்ளது.
நீல நிற ஆடை மற்றும் பெயர் பலகை அணிந்திருந்த சந்தேகநபர், திங்கட்கிழமை நீதிமன்றத்தில் முன்னிலைப்படுத்தப்பட்டபோது அமைதியாகக் காணப்பட்டார்.
நீதிபதியின் பெரும்பாலான கேள்விகளுக்கு அவர் “ஆமாம், உங்கள் கணம்” (yes, your honour) அல்லது “இல்லை, உங்கள் கணம்” (no, your honour) என்று மெதுவான குரலில் பதிலளித்தார். அவர் தனது வயதைக் குறிப்பிட்டதுடன், முதுகலைப் பட்டம் பெற்றிருப்பதாகவும் தெரிவித்தார்.
