ஈரானுக்கும் அமெரிக்காவுக்கும் இடையே ஏற்பட்டுள்ள புதிய உடன்பாட்டின்படி, இரு நாடுகளுக்கும் இடையிலான போர்நிறுத்தம் மேலும் 60 நாட்களுக்கு நீட்டிக்கப்பட்டுள்ளது. அத்துடன், மோதல்கள் தொடங்கியதில் இருந்து மூடப்பட்டிருந்த மிக முக்கியமான ஹார்முஸ் ஜலசந்தி வர்த்தகப் பாதை மீண்டும் திறக்கப்படவுள்ளது.
பிரான்சில் நடைபெற்ற ஜி7 உச்சி மாநாட்டில் புதன்கிழமை பேசிய டொனால்ட் டிரம்ப், அடுத்த 48 மணி நேரத்தில் இது தொடர்பான புரிந்துணர்வு ஒப்பந்தம் (MOU) கையெழுத்தாகும் என்று குறிப்பிட்டிருந்தார்.
இந்நிலையில், புதன்கிழமை மாலை டிரம்ப் இந்த ஒப்பந்தத்தில் கையெழுத்திட்டதை வெள்ளை மாளிகை அதிகாரி ஒருவர் உறுதிப்படுத்தினார்.
அமெரிக்க அதிபரின் பேச்சுவார்த்தைக் குழுவிற்கும் ஈரானுக்கும் இடையே எட்டப்பட்டுள்ள புரிந்துணர்வு ஒப்பந்தத்தின் (MOU) 14 முக்கிய அம்சங்கள் இதோ:
- லெபனான் உட்பட அனைத்து முன்னணிகளிலும் இராணுவ நடவடிக்கைகளை “உடனடியாகவும் நிரந்தரமாகவும் நிறுத்துதல்”. ஈரான் ஆதரவு ஹிஸ்புல்லாவிற்கு எதிராக இஸ்ரேல் லெபனானில் ஓரளவு ஆக்கிரமித்து, தொடர்ந்து தாக்குதல் நடத்தி வருகிறது என்பது குறிப்பிடத்தக்கது.
- அமெரிக்காவும் ஈரானும் “ஒன்றையொன்று இறையாண்மை மற்றும் பிராந்திய ஒருமைப்பாட்டை மதிக்கவும், ஒருவருக்கொருவர் உள்விவகாரங்களில் தலையிடுவதைத் தவிர்க்கவும்” ஒப்புக்கொள்கின்றன.
- இரு நாடுகளும் “அதிகபட்சம் 60 நாட்களுக்குள் இறுதி ஒப்பந்தத்தை பேச்சுவார்த்தை மூலம் எட்ட உறுதியளிக்கின்றன. இது இருதரப்பு சம்மதத்துடன் நீட்டிக்கப்படலாம்”.
- புரிந்துணர்வு ஒப்பந்தம் கையெழுத்தானதைத் தொடர்ந்து, ஹார்முஸ் ஜலசந்தியில் உள்ள கடற்படை முற்றுகையை அமெரிக்கா அகற்றத் தொடங்கும், 30 நாட்களுக்குள் அதை முழுமையாக முடிவுக்குக் கொண்டுவரும். இறுதி ஒப்பந்தம் எட்டப்பட்ட 30 நாட்களுக்குள் ஈரானின் “அருகாமையில்” உள்ள தனது படைகளை அகற்றவும் அமெரிக்கா ஒப்புக்கொள்ளும். பெயரிடப்படாத சிரேஷ்ட அமெரிக்க அதிகாரி ஒருவர், பிராந்தியத்தில் தங்களது படைகளின் நிலை மோதலுக்கு முந்தைய நிலைக்குத் திரும்பும் என்று கூறினார்.
- ஹார்முஸ் ஜலசந்தி வழியாகக் கப்பல்கள் பாதுகாப்பாகச் செல்வதற்கு அனுமதிப்பதாக ஈரான் உறுதியளிக்கிறது. கண்ணிவெடிகள் அகற்றப்பட வேண்டிய இந்த பாதையில் பயணிக்க “கட்டணம் ஏதுமில்லை”. வளைகுடா நாடுகள் ஜலசந்தி வழியாகத் தடையற்ற போக்குவரத்திற்கு “பரந்த ஒப்பந்தம்” நோக்கிச் செயல்படும் என்று அமெரிக்க அதிகாரி மேலும் கூறினார்.
- ஈரானின் “மறுசீரமைப்பு மற்றும் பொருளாதார மேம்பாட்டிற்காக” குறைந்தது $300 பில்லியன் மதிப்பிலான உறுதியான, பரஸ்பரம் ஒப்புக்கொள்ளப்பட்ட திட்டத்தை உருவாக்க அமெரிக்கா பொறுப்பேற்கிறது. இருப்பினும், அமெரிக்கப் பணம் எதுவும் ஈரானுக்குச் செல்லாது என்று அமெரிக்க அதிகாரி வலியுறுத்தினார்.
- இறுதி ஒப்பந்தம் எட்டப்படும்போது, ஐக்கிய நாடுகள் பாதுகாப்புச் சபை (UNSC) தீர்மானங்கள் உட்பட ஈரான் மீதான அனைத்து தடைகளையும் நிறுத்த அமெரிக்கா உறுதியளிக்கிறது. “தடைகளை நீக்குவதன் முக்கியத்துவத்தை” இரு நாடுகளும் ஒப்புக்கொள்கின்றன.
- மிக முக்கியமாக, ஈரான் “அணு ஆயுதங்களை வாங்கவோ அல்லது உருவாக்கவோ மாட்டாது என்று மீண்டும் உறுதிப்படுத்துகிறது”. சர்வதேச அணுசக்தி முகமையின் மேற்பார்வையின் கீழ் “பரஸ்பரம் ஒப்புக்கொள்ளப்பட்ட” பொறிமுறையின் மூலம் செறிவூட்டப்பட்ட யுரேனியம் கையிருப்பை அகற்றுவதற்கும் இது ஒப்புக்கொள்கிறது. இது அமெரிக்காவிற்கு கிடைத்த “மிகப் பெரிய வெற்றி” என்று அமெரிக்க அதிகாரி விவரித்தார்.
- ஈரானின் அணுசக்தித் திட்டம் மற்றும் அமெரிக்காவின் நிலைப்பாடு குறித்து இறுதி ஒப்பந்தம் வரும் வரை இரு நாடுகளும் “தற்போதைய நிலையைக் (status quo) கடைப்பிடிக்கும்”. அமெரிக்கா பிராந்தியத்தில் மேலதிக இராணுவ வளங்களை நிலைநிறுத்தாது.
- ஈரானிய கச்சா எண்ணெய், பெட்ரோலிய பொருட்கள் மற்றும் அவற்றின் வழிப்பொருட்களை ஏற்றுமதி செய்வதற்கும், வங்கிப் பரிவர்த்தனைகள், காப்பீடுகள், போக்குவரத்து உள்ளிட்ட அனைத்து சேவைகளுக்கும் அமெரிக்கா “விலக்கு அளிக்கும்” (waivers).
- புரிந்துணர்வு ஒப்பந்தம் வெற்றிகரமாகச் செயல்படுத்தப்பட்டவுடன், ஈரானின் முடக்கப்பட்ட சில நிதிகள் மற்றும் சொத்துக்களை அமெரிக்கா விடுவிக்கும்.
- புரிந்துணர்வு ஒப்பந்தத்தின் “வெற்றிகரமான அமலாக்கம் மற்றும் எதிர்கால இணக்கத்தை கண்காணிக்க” ஒரு பொறிமுறையை (mechanism) நிறுவ இரு நாடுகளும் ஒப்புக்கொள்கின்றன.
- புரிந்துணர்வு ஒப்பந்தத்தில் கையெழுத்திட்டவுடன், அமெரிக்காவும் ஈரானும் “மற்ற பத்திகளின் அடிப்படையில் பிரத்தியேகமாக இறுதி ஒப்பந்தம் குறித்த பேச்சுவார்த்தைகளைத் தொடங்க” உறுதியளிக்கின்றன.
- “இறுதி ஒப்பந்தம் ஐநா பாதுகாப்புச் சபையின் கட்டாயத் தீர்மானத்தின் மூலம் அங்கீகரிக்கப்படும்” என்று இறுதிப் புள்ளி கூறுகிறது.
