பொதுச் சொத்துக்கள் சட்டத்தின் கீழ் முன்னாள் ஜனாதிபதி ரணில் விக்ரமசிங்கவுக்கு எதிராக தாக்கல் செய்யப்பட்டுள்ள வழக்கு, இன்று (29) கொழும்பு கோட்டை நீதவான் நீதிமன்றத்தில் மீண்டும் விசாரணைக்கு எடுத்துக் கொள்ளப்படவுள்ளது.
ஜனாதிபதியாக பதவியில் இருந்தபோது, 2023 ஆம் ஆண்டு தனது மனைவி பேராசிரியர் மைத்திரி விக்ரமசிங்கவுக்கு பிரித்தானிய பல்கலைக்கழகம் ஒன்றில் கௌரவம் வழங்கும் நிகழ்வில் கலந்து கொள்வதற்காக, முன்னாள் ஜனாதிபதி ரணில் விக்ரமசிங்க பொது நிதியை துஷ்பிரயோகம் செய்ததாக குற்றஞ்சாட்டப்பட்டுள்ளது. இந்த பயணத்தை உத்தியோகபூர்வ பயணமாக முன்வைத்து, ஒரு நாள் அரை நாள் பயணத்திற்காக 16.6 மில்லியன் ரூபா பொது நிதியை தவறாகப் பயன்படுத்தியதாக வழக்குத் தொடரப்பட்டுள்ளது.
இந்த வழக்கு தொடர்பாக, குற்றப் புலனாய்வுத் திணைக்களத்தில் வாக்குமூலம் அளிப்பதற்காக 2025 ஆம் ஆண்டு ஆகஸ்ட் 22 ஆம் திகதி ஆஜரான முன்னாள் ஜனாதிபதி கைது செய்யப்பட்டார். பின்னர் நீதிமன்றத்தில் ஆஜர்படுத்தப்பட்ட அவர், 2025 ஆம் ஆண்டு ஆகஸ்ட் 26 ஆம் திகதி வரை விளக்கமறியலில் வைக்கப்பட்டார். தொடர்ந்து, மருத்துவ அறிக்கைகளை பரிசீலித்த கொழும்பு கோட்டை நீதவான் நிலுபுலி லங்கபுரா, பின்னர் தலா 5 மில்லியன் ரூபா பெறுமதியான மூன்று சரீரப் பிணைகளில் அவரை விடுவிக்க உத்தரவிட்டார். வழக்கு பின்னர் 2025 ஆம் ஆண்டு அக்டோபர் 29 ஆம் திகதிக்கு ஒத்திவைக்கப்பட்டது. அக்டோபர் 29 ஆம் திகதி வழக்கு விசாரணைக்கு எடுத்துக் கொள்ளப்பட்டபோது, 2026 ஆம் ஆண்டு ஜனவரி 28 ஆம் திகதிக்குள் விசாரணைகளை நிறைவு செய்யுமாறு நீதவான் உத்தரவிட்டிருந்தார்.
வழக்கு இன்று மீண்டும் விசாரணைக்கு எடுத்துக் கொள்ளப்பட்டபோது, சட்டமா அதிபர் சார்பில் முன்னிலையான மேலதிக சொலிசிட்டர் ஜெனரல் திலீப பீரிஸ், முன்னாள் ஜனாதிபதி ரணில் விக்ரமசிங்கவுக்கு எதிரான விசாரணைகள் ஒரு மாதத்திற்குள் நிறைவு செய்யப்படும் என்றும், மார்ச் மாதம் உத்தியோகபூர்வ குற்றப்பத்திரிகை தாக்கல் செய்யப்படும் என்றும் கொழும்பு கோட்டை நீதவான் நீதிமன்றத்திற்கு அறிவித்தார்.
அதே நேரத்தில், முன்னாள் ஜனாதிபதிக்கு வழங்கப்பட்ட பிணையை ரத்து செய்யுமாறு குற்றஞ்சாட்டப்பட்ட தரப்பினர் நீதிமன்றத்தில் கோரிக்கை விடுத்தனர். இருப்பினும், தற்போதைய நீதவான் நெத்திகுமார, முன்னாள் நீதவான் வழங்கிய பிணை உத்தரவை மறுபரிசீலனை செய்ய உத்தேசிக்கவில்லை என்று தெரிவித்தார்.
மறுபுறம், முன்னாள் ஜனாதிபதி விக்ரமசிங்கவின் வழக்கறிஞர்கள், ஜனாதிபதியாக பதவியில் இருக்கும்போது மேற்கொள்ளப்படும் உத்தியோகபூர்வ மற்றும் தனியார் பயணங்களுக்கு இடையில் தெளிவான வேறுபாடு இல்லை என்றும், அந்தப் பயணம் பிரித்தானிய பல்கலைக்கழகத்தின் அழைப்பின் பேரிலேயே மேற்கொள்ளப்பட்டதாகவும் சமர்ப்பித்திருந்தனர். எனவே, பொது நிதியை தவறாக பயன்படுத்தவில்லை என்று அவர்கள் வாதிட்டனர்.
