கான்பெர்ரா, டிசம்பர் 11: ஆஸ்திரேலியாவில் 16 வயதுக்குட்பட்ட சிறுவர்கள் சமூக ஊடகங்களைப் பயன்படுத்துவதற்குத் தடை விதிக்கும் புதிய சட்டம் அமுலுக்கு வந்துள்ளது. இந்தச் சட்டத்திற்கு இணங்கப் போவதாக எலான் மஸ்க்கின் ‘X’ (முன்னாள் ட்விட்டர்) நிறுவனமும் அறிவித்துள்ளது.
“இது எங்கள் விருப்பம் அல்ல, ஆஸ்திரேலியச் சட்டம் அதைத்தான் கோருகிறது,” என்று ‘X’ நிறுவனம் ஒரு அறிக்கையில் தெரிவித்துள்ளது.
பின்னணி: ஆஸ்திரேலியாவில் ஃபேஸ்புக், யூடியூப், டிக்டாக் உட்பட 10 முக்கிய சமூக ஊடகத் தளங்களில் 16 வயதுக்குட்பட்டவர்கள் கணக்கு வைத்திருப்பதற்குத் தடை விதிக்கப்பட்டுள்ளது. இந்தத் தடையை எவ்வாறு அமுல்படுத்தப் போகிறோம் என்பதைத் தெரிவிப்பதில் ‘X’ நிறுவனம் தான் கடைசியாக இருந்தது. தற்போது அனைத்து நிறுவனங்களும் இளம் பயனர்களை அகற்ற நடவடிக்கை எடுக்க ஒப்புக்கொண்டுள்ளன.
சட்டத்தின் கடுமை: ஆஸ்திரேலியாவைச் சேர்ந்த 16 வயதுக்குட்பட்ட பயனர்களின் கணக்குகளை அகற்றத் தவறினால், சம்பந்தப்பட்ட சமூக ஊடக நிறுவனங்களுக்கு 33 மில்லியன் அமெரிக்க டாலர்கள் வரை அபராதம் விதிக்கப்படும்.
அரசாங்கத்தின் நோக்கம்: சிறுவர்களின் தொலைபேசித் திரைகளில் வன்முறை, பாலியல் உள்ளடக்கம் மற்றும் அச்சுறுத்தல் போன்றவற்றை நிறைக்கும் “வேட்டையாடும் அல்காரிதம்களிடமிருந்து” (predatory algorithms) அவர்களைப் பாதுகாக்கவே இத்தகைய முன்னெப்போதும் இல்லாத நடவடிக்கைகள் தேவை என்று ஆஸ்திரேலிய அரசாங்கம் கூறுகிறது.
