இலங்கை சுகாதாரத்துறையை மேலும் வலுப்படுத்தும் நோக்கில், புதிதாகத் தெரிவு செய்யப்பட்ட 1056 குடும்ப நல சேவை அதிகாரிகளுக்கான நியமனக் கடிதங்கள் வழங்கும் விழா, சுகாதார மற்றும் வெகுசன ஊடகத்துறை அமைச்சர் வைத்தியர் நளிந்த ஜதிஸ்ஸ தலைமையில் நேற்று (04) டெம்பிள் ட்ரீஸ் வளாகத்தில் மிகக் கோலாகலமாக இடம்பெற்றது.
சுகாதாரத்துறையில் ஒரு முக்கிய மைல்கல்லாகக் கருதப்படும் இந்த நிகழ்வில், தரம் மிக்க மற்றும் பொறுப்புணர்வுடன் கூடிய சுகாதார சேவையை உறுதி செய்வதற்காக முறையான பயிற்சி பெற்ற இளம் அதிகாரிகள், சுகாதார சேவையில் புதிய அத்தியாயத்தை ஆரம்பிக்கத் தயாராகியுள்ளனர்.
ஒன்றரை வருட கால முறையான பயிற்சியை வெற்றிகரமாகப் பூர்த்தி செய்த இவர்கள், நாடு முழுவதும் உள்ள மாகாண சபைகள் மற்றும் அமைச்சுக்கு உட்பட்ட வைத்தியசாலைகள் மற்றும் சுகாதார நிறுவனங்களுக்கு இணைக்கப்படவுள்ளனர். இதன் மூலம், நாட்டில் உள்ள அனைத்து மக்களும் தரம் மிக்க மற்றும் பொறுப்புணர்வுடன் கூடிய சுகாதார சேவையை அனுபவிக்க முடியும் என்று எதிர்பார்க்கப்படுகிறது.
