நேற்று (16) நள்ளிரவு முதல் பல புகையிரத தொழிற்சங்கங்கள் 48 மணி நேர வேலைநிறுத்தப் போராட்டத்தை ஆரம்பித்துள்ள போதிலும், அனைத்து அலுவலக புகையிரதங்களும் வழக்கம் போல் இயங்குவதாக இலங்கை புகையிரத திணைக்களம் தெரிவித்துள்ளது.
புகையிரத திணைக்களத்தின் தற்போதைய பொது முகாமையாளரை பதவி நீக்குதல் உள்ளிட்ட பல கோரிக்கைகளை முன்வைத்து இந்த 48 மணி நேர வேலைநிறுத்தம் ஆரம்பிக்கப்பட்டுள்ளது.
தொடரும் தொழிற்சங்கப் போராட்டம் தொடர்பில் கருத்துத் தெரிவித்த புகையிரத நிலைய அதிபர்கள் சங்கத்தின் தலைவர் சுமேத சோமரத்ன, வேலைநிறுத்தம் ஆரம்பமாவதற்கு முன்னதாகவே நேற்று பல புகையிரத சேவைகள் இரத்துச் செய்யப்பட்டதால் பயணிகள் பெரும் சிரமத்திற்குள்ளாகியதாகத் தெரிவித்தார்.
புகையிரத வருமானத்தை அதிகரிப்பதற்கோ அல்லது பயணிகளுக்குத் தேவையான வசதிகளை வழங்குவதற்கோ முறையான வேலைத்திட்டம் எதுவும் தயாரிக்கப்படாத நிலையில், பொது முகாமையாளர் மற்றும் நிறைவேற்று அதிகாரிகள் தற்போது புகையிரதங்களை இயக்க முயற்சிப்பதாக அவர் மேலும் குற்றம் சாட்டினார்.
பெரும்பாலான புகையிரத நிலைய அதிபர்கள் வேலைநிறுத்தத்தில் இணைந்துள்ள நிலையில், அரசாங்கத்திற்கு ஆதரவான சில நிலைய அதிபர்கள் வேலைநிறுத்தத்தை சீர்குலைக்க முயற்சிப்பதாகவும், தற்போதைய பொது முகாமையாளரை தக்கவைக்க நடவடிக்கை எடுத்து வருவதாகவும் சுமேத சோமரத்ன கூறினார்.
இந்த தொழிற்சங்கப் போராட்டம் அரசியல் நோக்கங்களுக்காக முன்னெடுக்கப்படவில்லை எனவும், புகையிரத திணைக்களத்தை சீரமைக்கும் நோக்கிலேயே முன்னெடுக்கப்படுவதாகவும் அவர் வலியுறுத்தினார்.
