உண்மையான சூத்திரதாரிகள் வெளியில் உள்ளனர்; நீதிக்காகச் சாட்சியமளிக்கத் தயார்

உயிர்த்த ஞாயிறு பயங்கரவாதத் தாக்குதல்கள் தொடர்பான வழக்கில் குற்றவாளியாகக் காணப்பட்டு 200 ஆண்டுகள் சிறைத் தண்டனை விதிக்கப்பட்ட ஆறாவது பிரதிவாதி, இத்தாக்குதல்களுக்குப் பின்னணியில் உள்ள உண்மையான சூத்திரதாரிகள் இன்னும் வெளியில் சுதந்திரமாக நடமாடுவதாக கொழும்பு மேல் நீதிமன்றில் பகிரங்கமாகத் தெரிவித்துள்ளார். தமக்குச் சந்தர்ப்பம் வழங்கப்பட்டால் நீதியைப் பெற்றுக்கொடுக்க சாட்சியமளிக்கத் தயாராக இருப்பதாகவும் அவர் குறிப்பிட்டுள்ளார்.

மொஹமட் அன்வர் மொஹமட் ரிஸ்கான் எனப்படும் அபூ தாரிக் என்ற ஆறாவது பிரதிவாதியே இந்த அதிரடி வாக்குமூலத்தை அளித்தார்.

செவ்வாய்க்கிழமை (22) இரவு கொழும்பு மேல் நீதிமன்றத்தின் மூவரடங்கிய நீதியரசர்கள் குழாமினால் வழங்கப்பட்ட வரலாற்று முக்கியத்துவம் வாய்ந்த தீர்ப்பில், ரிஸ்கான் குற்றவாளியாகக் காணப்பட்டு 200 வருட சிறைத் தண்டனை விதிக்கப்பட்டார். தண்டனை விதிக்கப்படுவதற்கு முன்னதாக, நீதிமன்றில் கருணை மனுவைச் சமர்ப்பித்த ரிஸ்கான், குற்றச் செயல்களில் ஈடுபட்டவர்கள் தண்டிக்கப்பட வேண்டும் என்றும், தானோ அல்லது தனது குடும்பத்தினரோ எந்தவொரு குற்றத்தையும் செய்யவில்லை என்றும் வலியுறுத்தினார்.

வழக்கு விசாரணைகள் முழுவதும் ரிஸ்கான் நீதிமன்றில் எந்தவொரு அறிக்கையையும் வெளியிடவில்லை என்பதுடன், அவர் சார்பில் சட்டத்தரணிகளும் முன்னிலையாகியிருக்கவில்லை. தண்டனை விதிப்புக்கு முன்னதான கருணை மனுவின் போதே அவர் நீதிமன்றில் உரையாற்றினார்.

நீதிமன்றில் ரிஸ்கான் அளித்த வாக்குமூலம்:

“எனது குடும்பம் பாதிக்கப்பட்டவர்களுக்கு எந்தத் தீங்கும் செய்யவில்லை. நாங்கள் எந்தத் தப்பும் செய்யவில்லை என்பது அல்லாஹ்வுக்குத் தெரியும். ஏதோ நடந்தது, நாங்கள் அதில் சிக்கிக் கொண்டோம். நெருப்பில்லாமல் புகையாது. இதற்குப் பொறுப்பேற்க வேண்டியவர்கள் இன்னும் வெளியில் சுதந்திரமாக இருக்கிறார்கள். வெளியில் இருக்கும் அவர்களுடன் தொடர்புடையவர்கள் இந்தச் சுமையைத் தலைக்கு மேல் சுமந்துகொண்டு வாழ்கிறார்கள். நீதியை உறுதிப்படுத்த எனக்கு ஒரு வாய்ப்பு வழங்கப்பட்டால், நீதிக்காக நான் பேசுவேன். நாங்கள் செய்யாத ஒன்றுக்காக ஏன் இந்த நிலையில் வைக்கப்பட்டுள்ளோம்? ஒரு தப்பு நடந்துவிட்டது, ஆனால் நாங்கள் அதைச் செய்யவில்லை. குற்றத்தைச் செய்தவர்கள் நிச்சயமாகத் தண்டிக்கப்பட வேண்டும். இப்படிப்பட்ட விசாரணையை நான் இதற்கு முன் பார்த்ததில்லை. எனது மனைவி புற்றுநோயால் பாதிக்கப்பட்டுள்ளார். எனது தாய்க்கு 75 வயது. எனது சகோதரி சாதாரண தரப் பரீட்சையை முடித்துள்ளார். ஆனால் நான் அதைப் பற்றி நினைக்கவில்லை. நான் முழுமையாக நிம்மதியாக இருக்கிறேன். இந்தச் சம்பவம் தொடர்பாகச் சாட்சியமளிக்க நான் தயாராக இருக்கிறேன். அதாவது நீதியை உறுதிப்படுத்துகிறேன்.”

தீர்ப்பின் முக்கிய அம்சங்கள்:

மூவரடங்கிய மேல் நீதிமன்ற நீதியரசர்கள் குழாமினால் இந்தத் தீர்ப்பு ஒருமனதாக வழங்கப்பட்டது. விசாரணையை எதிர்கொண்ட 24 பிரதிவாதிகளில் 15 பேர் குற்றவாளிகளாகக் காணப்பட்டு 200 முதல் 260 ஆண்டுகள் வரை சிறைத் தண்டனை விதிக்கப்பட்டனர். எஞ்சிய 9 பேர் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்படாததால் அவர்கள் விடுவிக்கப்பட்டனர்.

நீதியரசரின் விளக்கம்:

தீர்ப்பு குறித்து விளக்கிய மேல் நீதிமன்ற நீதியரசர் நவரத்ன மாரசிங்க, பயங்கரவாதத் தடைச் சட்டத்தின் கீழ் சதி செய்தல், உடந்தையாக இருத்தல், தீவிரவாதக் கொள்கைகளை ஊக்குவித்தல் மற்றும் சமூகங்களுக்கு இடையே நல்லிணக்கத்தைக் கெடுத்தல் உள்ளிட்ட குற்றச்சாட்டுகள் சுமத்தப்பட்டிருந்ததாகக் குறிப்பிட்டார்.

தாக்குதலுக்கு முன்னர் நடத்தப்பட்ட தீவிரவாதச் சொற்பொழிவுகள், ஆயுதப் பயிற்சித் திட்டங்கள் மற்றும் பாதுகாப்பான வீடுகளைப் பராமரித்தல் தொடர்பான ஆதாரங்களுக்கு நீதிமன்றம் விசேட கவனம் செலுத்தியதாகவும் அவர் கூறினார். சதித் திட்டத்தில் ஈடுபடுபவர்கள் ஒரே இடத்தில் நேரில் இருக்க வேண்டிய அவசியமில்லை. ஒருவர் நேரடியாகவோ அல்லது மறைமுகமாகவோ, நடவடிக்கையின் ஆரம்பம், நடுப்பகுதி அல்லது இறுதியில் சதித்திட்டத்தின் ஒரு பகுதியாக மாறலாம் என்றும் நீதியரசர் சுட்டிக்காட்டினார்.

வழக்கின் பின்னணி:

இந்த விசாரணை 2023 அக்டோபர் 10 அன்று ஆரம்பமாகி, விரிவான நடவடிக்கைகளுக்குப் பிறகு இந்த ஆண்டு ஓகஸ்ட் 24 அன்று நிறைவடைந்தது. 24 பிரதிவாதிகளுக்கு எதிராக மொத்தம் 23,270 குற்றச்சாட்டுகள் தாக்கல் செய்யப்பட்டிருந்தன. அரச தரப்பு 2,309 சாட்சிகளை அழைத்தது, இது இலங்கையின் வரலாற்றில் மிகப்பெரிய மற்றும் மிகவும் சிக்கலான குற்றவியல் விசாரணைகளில் ஒன்றாகும்.

பயங்கரவாதத் தடைச் சட்டத்தின் கீழ் பொலிஸாரிடம் பிரதிவாதிகள் அளித்த 10 ஒப்புதல் வாக்குமூலங்களை, அவை தன்னார்வமாக அளிக்கப்பட்டவை என்பதை உறுதி செய்த பின்னர் நீதிமன்றம் ஆதாரமாக ஏற்றுக் கொண்டது. தாக்குதலில் உயிரிழந்தவர்களின் டிஎன்ஏ (DNA) அறிக்கைகள், அரச பகுப்பாய்வாளர் அறிக்கைகள் மற்றும் மருத்துவ அறிக்கைகளையும் அரச தரப்பு சமர்ப்பித்தது.

தவிர, வெடிபொருட்கள், வெடிபொருட்கள் தயாரிக்கப் பயன்படுத்தப்படும் இரசாயனங்கள், வாள்கள் மற்றும் துப்பாக்கிகள் உள்ளிட்ட 2,076 பொருட்கள் ஆதாரங்களாகச் சமர்ப்பிக்கப்பட்டன.

ISIS கொடியுடன் சத்தியப்பிரமாணம்:

அரச தரப்பால் சமர்ப்பிக்கப்பட்ட பென் ட்ரைவில் (pen drive) உள்ள வீடியோ காட்சிகளுக்கு நீதிமன்றம் விசேட கவனம் செலுத்தியது. இக்காட்சிகள் உயிர்த்த ஞாயிறுத் தாக்குதலுக்கு முந்தைய நாள் (2019 ஏப்ரல் 20) பதிவு செய்யப்பட்டிருந்தன. அதில் சஹ்ரான் ஹாஷிம் உள்ளிட்ட எட்டுப் பேர், ஐசிஸ் (ISIS) கொடியைக் காண்பித்து பைஅத் (bay’ah) பிரகடனம் செய்வதும், “நாங்கள் குண்டுகளைக் கட்டிக்கொண்டு சிரிக்கிறோம். நாளை இதைச் செய்வோம்” எனக் கூறுவதும் பதிவாகியிருந்தது. மவுண்ட் லவ்ினியாவில் உள்ள ஸ்பான் டவர் (Span Tower) என்ற இடத்தில் இந்த வீடியோ எடுக்கப்பட்டிருந்தது.

தண்டனை விபரங்கள்:

மேல் நீதிமன்ற உத்தரவின்படி, மொஹமட் இப்ராஹிம் மொஹமட் நௌபர் எனப்படும் நௌபர் மௌலவி மற்றும் ஏனைய 14 பிரதிவாதிகளுக்கு 200 முதல் 260 ஆண்டுகள் வரை சிறைத் தண்டனை விதிக்கப்பட்டது. 18வது பிரதிவாதியான யாசின் பாவா அப்துல் ரவூப் விசாரணை காலத்தின் போது சிறையில் உயிரிழந்தார்.

தீர்ப்பைத் தொடர்ந்து, பிரதிவாதிகளுக்கு மேல்முறையீடு செய்யும் உரிமை குறித்து அறிவிக்கப்பட்டது. குற்றவாளிகளாகக் காணப்பட்ட 15 பேரும், விடுவிக்கப்பட்ட 9 பேரும் புதன்கிழமை (23) அதிகாலை 2 மணியளவில் பலத்த பாதுகாப்புக்கு மத்தியில் மீண்டும் சிறைக்கு அழைத்துச் செல்லப்பட்டனர். விடுவிக்கப்பட்டவர்கள் வேறு ஏதேனும் வழக்குகள் இருந்தால் அதற்கேற்பவே விடுவிக்கப்படுவார்கள் என அதிகாரிகள் தெரிவித்தனர்.