தாய்லாந்து தனது விசா கொள்கைகளில் திருத்தங்களை மேற்கொண்டுள்ளதுடன், இந்த புதிய நடைமுறை எதிர்வரும் செப்டெம்பர் 15 ஆம் திகதி முதல் அமுலுக்கு வரவுள்ளது. தற்போதைய விசா சலுகைகளில் மாற்றங்களைச் சந்திக்கவுள்ள நாடுகளின் பட்டியலில் இலங்கையும் உள்ளடக்கப்பட்டுள்ளதாக அறிவிக்கப்பட்டுள்ளது.
அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில் கலந்துகொண்டு கருத்துத் தெரிவித்த வெளிவிவகார அமைச்சர் விஜித ஹேரத், தாய்லாந்து சமீபத்தில் உலகெங்கிலும் உள்ள பல நாடுகளுக்கான தனது விசா வழங்கும் கொள்கைகளை மதிப்பாய்வு செய்துள்ளதாக விளக்கினார். இதற்கமைய, தற்போதுள்ள விசா வசதிகள் தொடரப்படாத 60 நாடுகளை தாய்லாந்து அடையாளம் கண்டுள்ளதாகவும், அதில் இலங்கையும் உள்ளடங்குவதாகவும் அமைச்சர் குறிப்பிட்டார்.
இலங்கையர்கள் உட்பட வெளிநாட்டவர்கள் விசா சலுகைகளைத் தவறாகப் பயன்படுத்திய பல சம்பவங்களே இந்தத் தீர்மானத்திற்குப் பின்னணியில் உள்ள முக்கிய காரணம் என தாய்லாந்து அதிகாரிகள் சுட்டிக்காட்டியுள்ளனர். தற்போதைய விசா வசதிகளின் கீழ் தாய்லாந்திற்குப் பயணித்து, அங்கு சட்டவிரோத நடவடிக்கைகளில் ஈடுபட்டதாகக் கூறப்படும் இலங்கையர்கள் தொடர்பான பல சம்பவங்கள் அண்மைய மாதங்களில் பதிவாகியுள்ளதாக அமைச்சர் சுட்டிக்காட்டினார். போதைப்பொருள் தொடர்பான குற்றங்கள் முதல் தாய்லாந்திலிருந்து இலங்கைக்கு சட்டவிரோதமான பொருட்களைக் கொண்டுவர முயன்றமை வரையிலான பல சம்பவங்களை அதிகாரிகள் பதிவு செய்துள்ளதாகவும் அவர் குறிப்பிட்டார்.
இதன் விளைவாக, திருத்தப்பட்ட விசா கொள்கையால் பாதிக்கப்படும் 60 நாடுகளின் பட்டியலில் இலங்கையையும் சேர்க்க தாய்லாந்து முடிவு செய்துள்ளது. எவ்வாறாயினும், இது தொடர்பில் இலங்கை அரசாங்கம் ஏற்கனவே தாய்லாந்து அதிகாரிகளுடன் இருதரப்புப் பேச்சுவார்த்தைகளை ஆரம்பித்துள்ளதாக அமைச்சர் விஜித ஹேரத் தெரிவித்தார். இரு நாடுகளுக்கும் இடையிலான விசா வசதிகளை நிர்வகிக்கும் தனி இருதரப்பு ஒப்பந்தத்தில் கைச்சாத்திட தாய்லாந்து முன்மொழிந்துள்ளதாகவும் அவர் கூறினார்.
முன்மொழியப்பட்ட ஒப்பந்தம் தொடர்பான பேச்சுவார்த்தைகள் தற்போது நடைபெற்று வருவதுடன், குடிவரவு மற்றும் குடியகல்வுத் திணைக்களம் சமர்ப்பித்த அவதானிப்புகள் மற்றும் முன்மொழிவுகளை இலங்கை ஏற்கனவே வரைவு கட்டமைப்பில் இணைத்துள்ளது. இந்த வரைவு மேலதிக பரிசீலனை மற்றும் இறுதிப்படுத்தலுக்காக சட்டமா அதிபர் திணைக்களத்திற்கும் அனுப்பி வைக்கப்பட்டுள்ளது.
இந்த இருதரப்பு ஒப்பந்தத்தில் இரு நாடுகளும் வெகுவிரைவில் கைச்சாத்திட முடியும் எனவும், இதன்மூலம் இலங்கைக்கான விசேட விசா வசதிகளை மீண்டும் பெற்றுக்கொள்ள முடியும் எனவும் அமைச்சர் ஹேரத் நம்பிக்கை வெளியிட்டார். இதேவேளை, தாய்லாந்தில் இலங்கைத் தொழிலாளர்களின் வேலைவாய்ப்பு தொடர்பான தனித் தொழிலாளர் ஒப்பந்தத்தில் கைச்சாத்திடுவதற்காக எதிர்வரும் செப்டெம்பர் 14 ஆம் திகதி தான் தாய்லாந்திற்கு விஜயம் செய்யவுள்ளதாகவும், இந்த விஜயத்தின் போது புதிய விசா ஏற்பாடு குறித்தும் கலந்துரையாட எதிர்பார்த்துள்ளதாகவும் அவர் மேலும் தெரிவித்தார்.
