மண்டாடி திரைப்பட விமர்சனம்: கதையின் நாயகனாகக் கரைகண்ட சூரி – கடல் ராசாவாக விஸ்வரூபம்!

Rating: 4.5/5

Star Cast: சூரி, சுஹாஸ், சத்யராஜ், மஹிமா நம்பியார், மிதுன் ஜெய்சங்கர் Director: மதிமாறன் புகழேந்தி Music: ஜி.வி. பிரகாஷ் குமார்

சென்னை: நகைச்சுவை நடிகராக அறிமுகமாகி, தனது கடின உழைப்பாலும் அசாத்தியமான நடிப்புத் திறமையாலும் இன்று தமிழ் சினிமாவின் தவிர்க்க முடியாத ‘கதையின் நாயகனாக’ விஸ்வரூபம் எடுத்துள்ள சூரியின் ஆகச்சிறந்த படைப்புதான் இந்த ‘மண்டாடி’. வெற்றிமாறனின் பட்டறையில் தீட்டப்பட்ட வைரம் இப்போது திரையில் எப்படி ஜொலிக்கிறது என்பதற்கு ஆகச்சிறந்த உதாரணம் இந்தப் படம்.

இயக்குநர் மதிமாறன் புகழேந்தி இயக்கத்தில், ஜி.வி. பிரகாஷ் குமாரின் இசையில் இன்று திரையரங்குகளில் வெளியாகியுள்ள ‘மண்டாடி’, தமிழ் சினிமா இதுவரை சொல்லாத ஒரு புதிய களத்தைத் தொட்டு மாபெரும் வெற்றியைப் பதிவு செய்துள்ளது.

மண்டாடி கதை என்ன?

பாய்மரப் படகுப் போட்டியைத் தங்களது பாரம்பரிய அடையாளமாகப் பார்க்கும் ஒரு மீனவ கிராமம். அந்தப் போட்டியின் நாயகனாக, அந்த ஊரின் ஒளியாக இருப்பவர்தான் சூரி. தனது உயிராக மதித்த பாய்மரப் படகுப் போட்டி, காதலி என அனைத்தையும் ஒரு அசம்பாவிதத்தால் இழந்து, ஊரை விட்டுச் சென்று சென்னையில் அடைக்கலமாகிறார். பல வருடங்களுக்குப் பிறகு மீண்டும் ஊருக்குத் திரும்பும் அவர், தான் இழந்த பெருமையை, ஊரின் அடையாளத்தை எப்படி மீட்டெடுக்கிறார் என்பதே இந்த மாபெரும் கடல் காவியத்தின் கதை.

எப்படி இருக்கு படம்? – ஒரு திரைக்கதை அற்புதம்!

தமிழ் சினிமா இதுவரை பெரிதாகத் தொடாத ‘பாய்மரப் படகுப் போட்டி’ என்ற விஷயத்தை மெயின் தீமாக வைத்து, அதனை அத்தனை சுவாரஸ்யமாகவும் பரபரப்பாகவும் படமாக்கியிருக்கும் இயக்குநர் மதிமாறனுக்கு ஒரு பெரிய சல்யூட். மீனவ கிராம மக்களின் வாழ்வியலை இவ்வளவு ஆழமாகவும், ரசிகர்களுக்குப் புரியும்படியும், அடுத்தடுத்த காட்சிகள் என்ன நடக்கும் என்ற எதிர்பார்ப்புடனும் ஒரு திரைக்கதையை அமைத்தது இயக்குநரின் பெரும் சாதனை.

படத்தின் ஆகப்பெரும் ப்ளஸ் – அசுர நடிகனாக சூரி!

படத்தின் மிகப்பெரிய பலம் சந்தேகமே இல்லாமல் சூரிதான். காமெடியனாக இருந்து ஒரு சீரியஸான கதாபாத்திரத்திற்கு தன்னை எப்படி முழுமையாக அர்ப்பணித்திருக்கிறார் என்பதைப் பார்க்கும்போது புல்லரிக்கிறது. அவர் தோன்றும் முதல் காட்சியிலிருந்து இறுதி ஃப்ரேம் வரை தன் உடல்மொழி, பார்வை, உணர்ச்சிகள் என அனைத்திலும் ஒரு முழுமையான நாயகனைக் கண்முன் நிறுத்துகிறார்.

திரையில் அவர் தோன்றும்போதெல்லாம் ரசிகர்கள் எழுப்பும் ஆரவாரமும், கரகோஷமும் தியேட்டரை அதிர வைக்கிறது. “மாஸ் ஹீரோக்களே, உங்கள் வரிசையில் இதோ ஒரு முழுமையான நாயகன் வந்துவிட்டார்” என்று சூரி நிரூபித்துள்ளார். ஆச்சரியப்படும் வகையில், சூரிக்கான பெண் ரசிகைகளின் கூட்டமும் தியேட்டர்களில் பெருக்கெடுத்துள்ளது.

படம் முழுவதும் ஒருவித இறுக்கத்தோடு வலம் வரும் சூரியைப் பார்க்கையில், ‘இந்தப் புலி எப்போது பாயும்?’ என்ற எதிர்பார்ப்பை ரசிகர்களுக்குள் கடத்துகிறார். ஒரு குறிப்பிட்ட காட்சியில் அவர் உடைந்து அழும்போது, ஒட்டுமொத்த தியேட்டருமே கண் கலங்குகிறது. சூரி ஒரு சாதாரண நடிகர் அல்ல, அவர் ஒரு ‘மகா நடிகன்’ என்பதை மண்டாடி மீண்டும் அடித்துச் சொல்கிறது.

தொழில்நுட்பக் கலைஞர்களின் பிரம்மாண்டம்

ஜி.வி. பிரகாஷின் இசை படத்திற்கு மிகப்பெரிய தூண். மனிதர் பின்னணி இசையில் (Re-recording) அசுரத்தனம் காட்டியுள்ளார். பாய்மரப் படகுப் போட்டி நடக்கும்போது அவரது இசை நம்மை சீட்டின் நுனிக்குக் கொண்டு வருகிறது.

முனியாக வரும் சத்யராஜ், மாரியாக வரும் மிதுன் என அனைத்துக் கதாபாத்திரங்களும் மாஸ் மொமன்ட்ஸ்களுடன் திரையை ஆக்கிரமிக்கின்றனர். மஹிமா நம்பியார் குறைவான காட்சிகளில் வந்தாலும், தனது அபாரமான நடிப்பால் வாழ்நாள் முழுவதும் நினைவில் நிற்கும் அளவுக்கு ஸ்கோர் செய்துள்ளார். வில்லனாக வரும் சுஹாஸின் நடிப்பு மிரட்டல் ரகம்.

எஸ்.ஆர். கதிரின் ஒளிப்பதிவு நம்மை அந்த மீனவ கிராமத்திலேயே வாழ வைக்கிறது. பிரதீப் ராகவ்வின் எடிட்டிங் ஒரு இடத்தில்கூட சலிப்பை ஏற்படுத்தவில்லை. ‘பந்தயம் என்றால் போட்டி இல்லை அறிவு’ போன்ற ஆழமான வசனங்கள் படத்தின் உயிரோட்டத்தை அதிகரிக்கின்றன.

இறுதித் தீர்ப்பு

சிறு சிறு குறைகள் இருந்தாலும், படத்தின் பிரம்மாண்டமும் சூரியின் அசுரத்தனமான நடிப்பும் அனைத்தையும் மறக்கச் செய்துவிடுகின்றன. கோலிவுட் கடலில் யாராலும் வீழ்த்த முடியாத ஒரு ‘மண்டாடி’யாக சூரி உயர்ந்து நிற்கிறார்.

“மண்ணுக்குள் தலை போகும்வரை மண்டாடிக்கு எதுவும் மறக்காது” என்ற வசனத்தைப் போல, சூரியின் திரைப்பயணத்தில் ‘மண்டாடி’ என்றென்றும் நிலைத்து நிற்கும் ஒரு சரித்திர வெற்றியாகும்.

சூரிக்கு தமிழ் முரசின் மனமார்ந்த வாழ்த்துகள்!