தெஹிவளை, கவுடான சிறிசங்கபோ வீதியில் அமைந்துள்ள வீடொன்றை இலக்கு வைத்து நடத்தப்பட்ட கொடூரமான கைக்குண்டுத் தாக்குதலில் இரண்டு சிறுவர்கள் பரிதாபமாக உயிரிழந்தனர்.
இன்று (11) அதிகாலை இந்தத் தாக்குதல் நடத்தப்பட்டுள்ளதாக பொலிஸார் தெரிவித்துள்ளனர்.
இந்தத் தாக்குதல் இடம்பெற்ற போது, குறித்த வீட்டில் இருந்த ஒரே குடும்பத்தைச் சேர்ந்த தந்தை மற்றும் இரண்டு பிள்ளைகள் என மூவர் படுகாயமடைந்தனர். அவர்கள் உடனடியாக மீட்கப்பட்டு, சிகிச்சைக்காக களுபோவில போதனா வைத்தியசாலையில் அனுமதிக்கப்பட்டனர்.
எனினும், வைத்தியசாலையில் அனுமதிக்கப்பட்ட 10 மற்றும் 14 வயதுடைய இரண்டு சிறுவர்களும் சிகிச்சை பலனின்றி துரதிஷ்டவசமாக உயிரிழந்துள்ளனர்.
அதேவேளை, இச்சம்பவத்தில் காயமடைந்த சிறுவர்களின் 55 வயதுடைய தந்தை தொடர்ந்தும் களுபோவில வைத்தியசாலையில் சிகிச்சை பெற்று வருகின்றார்.
இந்தக் கைக்குண்டுத் தாக்குதலுக்கான பின்னணி என்ன என்பது குறித்து இதுவரை உறுதியான தகவல்கள் வெளியாகவில்லை. இந்தச் சம்பவம் தொடர்பில் பொலிஸார் விசேட விசாரணைகளை ஆரம்பித்துள்ளதுடன், தாக்குதலை மேற்கொண்டவர்களைக் கண்டறிந்து கைது செய்வதற்கான தேடுதல் நடவடிக்கைகளையும் தீவிரப்படுத்தியுள்ளனர்.
